Талдықорғанда фермер қол астындағы жұмыскерін сабап тастады

Фермер қол астындағы жұмысшыны аяусыз соққыға жықты. Жәбір көрген ер адам оның малын бағып, отбасымен фермада тұрған. Куәгерлердің айтуынша, 2 мамыр күні екеуі сөзге келіп қалған. Арадағы жанжалдан соң жұмысшы фермадан кетпек болған. Ашуға мінген қожалық иесі оны Лексук маркалы көлігімен басып кеткен. Сосын есінен танғанша таяқпен ұрған. Соққыға жығылған малшының тоғыз қабырғасы мен жауырыны сынып, ауруханаға жатқызылды. Қазір фермерге қатысты қылмыстық іс қозғалды. Оның қылмысы дәлелденсе үш жылдан сегіз жылға дейін сотталуы мүмкін.