Түркістан облысында табиғи апаттан зардап шеккен тұрғындардың шығыны өтелетін болады. Қазір облыс әкімінің төрағалығымен арнайы құрылған комиссия шығын көлемін есептеп жатыр. Соңғы дерек бойынша, 53 үйдің ауласына, 19 үйге, 1 мейрамхана мен 16 ғимаратқа су кіргені анықталды. Сонымен қатар 370 бас мал өлді. Шығындарды өтеуге облыстық бюджеттің резервтік қорынан қаржы қаралған. Есеп-қисап жұмыстары біткен соң, үй жануарларының шығынына, тұрғын үйлерді қайта қалпына келтіруге, ғимараттар мен тұрғын үйлердің шатырын жөндеуге, шаруашылық ғимараттарды реттеуге көмек көрсетіледі.
Зардап шеккен ауыл-аймақты аралап көрген облыс әкімінің орынбасары Сәкен Қалқаманов апаттан келген шығын көлемін есептеу үшін Алматыдағы құрылыс және архитектура ғылыми зерттеу институтынан ғалымдар арнайы шақырылғанын жеткізді. Айтуынша олар үй-жайдың немесе қосымша құрылыстардың қаншалықты бүлінгенін анықтап, оны жөңдеу немесе жаңадан тұрғызу керектігін белгілейді.
