Жыл үздіктері анықталды. Облыстағы әр саланың кіл мықтылары марапатталып, бірқатары «Құрметті азамат» атағын иеленді. Жылды жетістіктермен қорытындылаған Өмірзақ Шөкеев Түркістанның дамуына үлес қосқандардың еңбегін еледі. Жылдың нүктесін қойған салтанатты кеш жайында тілші материалында.
Сәкен Бибосыновқа Түркістаннан екі бөлмелі пәтердің кілті табысталды. Сәкен үшін биылғы жыл табысты жыл болды. Токио олимпиадасында қола жүлдегер атанған ол әлем чемпионатының айқас алаңында өзінің талантын әлемге паш етті. Бұдан бөлек, «ел қорғаны», «үздік спортшы» сынды номинацияларға да ие болды.
Сәкен Бибосынов, бокстан әлем чемпионы:
«Еңбегімізді бағалап пәтер сыйлап жатыр. Осындай марапат алдағы жарыстарда мотивация болады деп ойлаймын. Алар асуымыз тек қана алда деп ойлаймыз. Мұнымен тоқтап қалмаймыз. Бұл жеңіс тек қана менің ғана жеңісім емес. Өзімнің жеке бапкерімен бірге ақылдасып, еңбектің арқасында келген жеңіс деп ойлаймын. Бұйыртса алдағы жарыстарда елімізді қуантатын боламыз».
Жылды жетістікпен қорытындылаған Өмірзақ Шөкеев еңбегіне қарай бірнеше аталым бойынша үздіктерді марапаттады. Олар ауданның экономикалық және әлеуметтік дамуына өзіндік үлес қосқан әр саланың үздіктері. Түрлі шараларда дараланғандар үшін арнайы салтанатты кеш ұйымдастырылды. Облыс әкімі сөз бастап, түрлі топ жарып жүргендерге алғысын білдірді
Өмірзақ Шөкеев, Түркістан облысының әкімі:
«Бүгінгі берілер марапаттар- жыл бойы жасаған жұмыстарыңызға берілген лайықты баға. Мәртебелі құрмет деп білемін. Толағай табыстар мен жарқын жетістіктерге жеткізген осы жылдағы көрсеткіштеріміз жаңа жылда еселене береді деп сенемін. Сіздерді жаңа белестерді бірлесе бағындыруға мәңгілік елімізді бірге нығайтуға шақырамын».
Үздіктер марапатталған кеште «Облыстың құрметті азаматтарына» да арнайы лента мен төсбелгі табысталды. Солардың бірі «Nur Otan» партиясы облыстық филиалы төрағасының орынбасары Қалима Жантөреева.
Қалима Жантөреева, Nur Оtan партиясы Түркістан облыстық филиалы төрағасының орынбасары:
«Бүгін мен үшін аса бір ерекше күн. Кез келген адамға бұл атақ бұйырмайды. Сондықтан мен өте бағалаймын. Алдымда үлкен жауапкершіліктер күтіп тұр деп ойлаймын. Тәуелсіздіктің 30 жылдығының қарсаңында осындай марапатқа ие болу үлкен мәртебе. Бұл менің ғмана жұмысым емес,менімне бірге жүрген әріптестерімнің еңбегінің еленгені».
Білім, ғылым, денсаулық, мәдениет салалары бойынша үздіктерге арнайы статуетка үлестірілді. Сондай-ақ, облыс пен әлеуметтік экономикаға үлес қосқандарға медальдар тағылды. Осылайша, жыл үздіктері еңбегі елененіп, қошеметке ие болды.
