2021 жылғы ақпаратқа сәйкес әлемде 10 000-нан аса дін тіркелген. Ғалымдардың сөзінше, діндердің нақты санын дөп басып айту қиын. Дегенмен халықтың басым бөлігі ислам және христиан діндеріне бет бұрған. Әлемде дін көбейген сайын арандатушылар мен арбаушылардың да саны артары сөзсіз. Олардың бірі жасырын түрде насихат жүргізсе, енді бірі қоғамдық орында «құрбанын» іздейді. Алматы қаласы Дін істері жөніңдегі басқармасының басшысы Нұрлан Қиқымов, қоғамдық орында уағыз айтушыларға кезіксе, не істеу керектігін айтып берді.
Нұрлан Қиқымов деструктивті діни ағымдардың жақтаушылары өз «құрбандарын» таңдау кезінде белгілі бір адамдар санатын іздемейтінін айтады. Сөзінше, олар кез келген адамға келіп, әңгімесін қарапайым танысудан бастауы мүмкін.
Алдымен қарапайым танысудан бастап, кейін діни тақырыптарға көшеді. Қарым-қатынасты қолдап, әңгімені жалғастыратын адам, арбаушының тікелей құрбанына айналатыны сөзсіз. Сондықтан олар «құрбанын» таңдау кезде белгілі бір адамдардың санатын іздеп, әуре болмайды, – деді басқарма басшысы.
Сонымен қатар, Нұрлан Қиқымов діни идеяларды тек ресми тіркелген діни бірлестіктердің атынан және миссионер ретінде тіркеуден өткен адамдар ғана тарата алатынын қосып өтті.
«Бұл ереже Қазақстан Республикасының 2011 жылғы 11 қазанындағы «Діни қызмет және діни бірлестіктер туралы» Заңында белгіленген. Заңға сәйкес миссионерлер тек діни ғимараттың аумағында ғана қызмет атқаруы керек. Олай болмаған жағдайда, мұндай қызмет заңсыз болып табылады және «Әкімшілік құқық бұзушылық туралы» кодекспен қудаланады. Елімізде ешкім өз дінін басқа біреуге міндеттей алмайды. Ең алдымен осыны білген абзал», – деп толықтырды ол.
