Вакцинадан кейін 4 оқушының жағдайы ауыр халде. Оқиға Солтүстік Қазақстан облысы Тимирязев елді мекеніндегі мектептердің бірінде болған. Осы мазмұндағы ақпарат әлеуметтік желіге жарияланып, елді дүрліктірді. Бұл мәлімет қаншалықты рас? Бас дәрігер не дейді? Нұрлан Сұлтанбек анықтап көрді.
Әлеуметтік желіде желдей ескен бұл ақпарат шындыққа жанаспайды. Жазбадағы мәліметті жауаптылар жоққа шығарып отыр. Керісінше, ол ауданда екпе алғандардан ешқандай шағым түспеген дейді. Ал, күні кеше басталған ревакцинация жұмыстары қарқынды жүргізілуде. Үкімет отырысында осылай деген Алексей Цой, жаңа дозаның кері әсері байқалмағанын алға тартты.
Алексей Цой, ҚР Денсаулық сақтау министрі:
«Елімізде эпидахуал тұрақты. Біз жағдайдың одан әрі жақсарғанын қалаймыз. Дегенмен коронавирустың ешқайда кетпегенін ұмытпаған жөн. Еуропада не болып жатқанын көріп отырсыздар, локдаун жариялап жатыр. Бұл көршілес Ресейге де қатысты, сондықтан біз сақтық шараларын күшейте түсуіміз керек».
Сондай-ақ Цой министрлікте шу шығарған антиваксер аналарға да қатысты түсініктеме берді. 19 қараша күні елордалық көпбалалы аналар министрдің отставкаға кетуін талап етті. Дегенмен екпені ерсі көріп, сынағандардың басым көпшілігі вакцина қабылдаған дейді ол.
Алексей Цой, ҚР Денсаулық сақтау министрі:
«Таяуда «коронавирусқа қарсы вакцина алуды міндеттемеңіздер» деп талап қойғандар болды. Менің айтарым, Қазақстанда вакцина алу міндетті емес, ешкімді ешкім мәжбүрлемейді. Екпе алғыңыз келмесе, ерік өзіңізде, сізге ешкім қинап вакцина салмайды. Ал ревакцинацияға келсек, ол қайта екпе алып, иммунитетімді күшейтемін деушілерге арналып отыр».
Түркістан облысында екпе алу екпіні жоғары. Аймақта Pfizer вакцинасын 9 мыңнан астам адам қабылдаған. Облыстың бас дәрігері қайта вакцинациялауға әсіресе отандық екпе қорының жеткілікті екенін мәлімдеді.
Марат Пашимов, облыстық қоғамдық денсаулық басқармасының басшысы:
«Қазіргі таңда облысымызда халықты ревакцинациялау үшін «КазВак» вакцинасы жеткілікті мөлшерде. Отандық вакцина өзінің қауіпсіздігі мен тиімділігін дәлелдеген. Әлемде Covid-19 инфекциясын жеңудің бірден-бір жолы вакцина салдыру екені дәлелденді. Сондықтан экономикасы мықты мемлекеттердің барлығы екпе алушылар контингенттерін кеңейту үстінде».
«Pfizer» вакцинасын қабылдағандар саны –9098 адамды құрайды. Оның ішінде 7005-і жасөспірімдер болса, 1424 – жүкті және лактация кезіндегі әйелдер – 669. Мамандар жасөспірімдерді медициналық тексеруден өткізіп, қарсы көрсетілімдері болмаған жағдайда ғана екпе салынатынын айтады. Қазіргі уақытта облыс бойынша, Pfizer вакцинасын салдыруға ниеттілердің саны артқан. Жалпы Түркістан облысына «Pfizer» вакцинасының 17550 дана мөлшеріндегі екінші партиясы жеткізілген.
