Шымкентте арзан пәтер алуға өтініш бергендер тізімінде әкімдер мен туыстары жүр. Баспана-кз сайтына жарияланған тізім лезде әлеуметтік желіге тарап, қоғамның ашу ызасын туғызған. Даулы оқиғадан кейін қала әкімінің орынбасары арнайы баспасөз мәслихатын өткізуіне тура келген. Ал Индустрия және инфрақұрылымдық даму министрі істі бақылауына алатынын мәлімдеп, кінәлі лауазымды тұлғалар жауапқа тартылатынын жеткізді.
Нарық бағасынан әлдеқайда төмен бағада ұсынылған пәтерлерге өтінішті Отбасы банк емес, қалалық тұрғын үй басқармасы арқылы қабылданған екен. Былық осы жерден басталған дейді тұрғындар. Бірнеше күннен бері әкімдіктің табалдырығын тоздырған олар онлайн өтінішті небәрі 11 секундта тапсырған шенеуніктерді анықтаған. Жұрттың сөзінше, мұндай уақыт аралығында өтініш беріп үлгеру мүмкін емес.
Белгілі болғандай, шаршы метрі небәрі 180 мың теңге тұратын 900 пәтерді алуға 12 мыңға жуық өтініш қабылданған. Өтінішті санаулы секундта тапсырғандардың ішінде қалалық цифрландыру басқармасының басшысы Әсет Әбдірахманов пен Абай ауданының әкімі Бұқарбай Парманов бар. Сондай-ақ оның ұлы мен конкурсты өткізіп отырған тұрғын үй басқармасы басшысының әйеліде бар көрінеді. Осы шудан кейін брифинг өткізген қала әкімінің орынбасары тұрғын үй басқармасы басшысы Ғалымжан Өтенбаев қызметтен уақытша шеттетілгенін жеткізді.
Ерғали Білісбеков — Шымкент қаласы әкімінің орынбасары:
«3 жыл болды. Басқа санаттарға беріп жатырмыз ғой. Например сусынға 400-500 үй береміз, басқа санаттарға береміз. Например мемелекетте жұмыс істеп жүргендер олар да жұмыс істеп жүр ғой. Оларға үй берілмейді. Біздің мемелекетте Заңда қарастырылмаған. Бүгін ол мәселені көтеріп жатырмыз. Парламентке жаздық, министірлікке де жаздық».
Индустрия және инфрақұрылымдық даму министрі Шымкентте 7-20-25 бағдарламасы бойынша санкцияланбанған конкурсқа қатысты істі бақылауына алатынын мәлімдеді. Қайырбек Өскенбаев кінәлі лауазымды тұлғалар жауапқа тартылады, деп уәде берді.
Қайырбек Өскенбаев — ҚР Индустрия және инфрақұрылымдық даму министрі:
«Бұл үйлер 7-20-25 бағдарламасы арқылы емес, «Отбасы банк» арқылы үй кезегінде тұрған жандарға беріледі. Осыған байланысты әкімдік тұрғын үйді сату үшін аталған банкпен қажетті келісім жасауы тиіс. Менің тапсырмам бойынша кінәлі лауазымды тұлғаларды жауапкершілікке тарту жөніндегі мәселе құзыретті органдармен қаралады. Нәтижелері туралы қосымша хабарланатын болады».
Айта кетейік, бүгінде аты аталған екі әкім тізімнен өзі өтініштерімен шығып кеткен. Ендігі кезеңде арнайы комиссия барлық өтінімдерді зерделеп, құжаттарды тексеретін болады. Оның құрамында БАҚ өкілдері, қоғамдық кеңес мүшелері бар. Сыбайлас жемқорлыққа жол берілмес үшін олардың аты-жөні жарияланбайды.
