Індетке қарсы вакцинаның кесірінен ондаған кәсіби спортшы қайтыс болды. Ал оны бұқаралық ақпарат құралдары қорқынышты статистиканы әдейі жарияламайды. Әлеуметтік желі мен мессенджерлерде осындай ақпарат таралуда. Алайда Stopfake жобасының мамандары оның жалған ақпарат екенін дәлелдеді. Дегенмен желіде вакцинация науқанына кері әсерін тигізетін жалған ақпараттар күн санап артып келеді. Ал ол мәліметтердің рас, өтірігін қалай ажыратамыз? Тілшіміз Назым Қайратқызы анықтап көрді.
«Қазақстанда ата-аналардың келісімінсіз оқушыларды вакцинациялау туралы бұйрық шықты». Бұл – желіде желдей ескен жалған ақпараттардың тағы бірі. Еліміздің санитарлық-эпидемиологиялық бақылау комитеті ресми түрде жоққа шығарды. Денсаулық сақтау министрлігінің мәліметінше, бүгінге дейін елімізде 60 мың 325 жасөспірімге екпе салынған. Барлығына да ата-анасы келісім берген. Дегенмен халықтың осы сынды фейк ақпараттарға реакциясын тексеру мақсатында біз арнайы сауалнама жүргізіп көрдік.
БЛИЦ:
«Ата-анасының рұқсатынсыз балаларға екпе салуға ешкімнің құқығы жоқ».
«Әр адам өз баласының денсаулық жағдайын жақсы біледі. Сондықтан олар келісім бермей, балаға вакцина салу деген дұрыс емес».
«Менің 7 бала-шағам бар. Вакцина салдыруға қарсымын. Өзім де, жолдасым да салдырмады. Наразылық ретінде ереуілге шығуға да дайынмын».
Көріп отырғанымыздай, қала тұрғындары естіген кез келген ақпаратқа оңай сенетін болып шықты. Демек, осы сынды фейк ақпараттар адам бойына қорқыныш пен үрей ұялатады. Мәселенің шешімін табу үшін қайтпек керек?
Думан Смақов, сарапшы:
«Жалған ақпаратты таратушыларға ҚР ҚК арнайы жаза қарастырылған. Дегенмен барлығының аузына қақпақ бола алмайсың. Сондықтан қазіргі басты проблема-халық арасында ағартушылық жұмыстарды жүргізу. Ол телеарналардағы бағдарламалар болсын, ненің өтірік ненің шын екенін ажыратуды үйрететін».
Ал ҚР санитарлық-эпидемиологиялық бақылау комитетінің ресми өкілі Ержан Байтанаев қазақстандықтарды вакцинацияға қатысты әлеуметтік желілер мен мессенджерлерде тараған күмәнді ақпаратқа сенбеуге шақырды. «Екпе алуға қатысты ресми мәліметтерді алу үшін тек сенімді ақпарат көздеріне жүгінген жөн», – дейді ол.
