Теңгенің долларға шаққандағы бағамы 495 теңгеге жетті. Осылайша үш күннің ішінде АҚШ көкқағазы 30 теңгеге жуық қымбаттап отыр. Бүгін таңертең Ұлттық банк қор биржасымен бірлесіп сағат 15:00-ге дейін биржалық валюталық сауда-саттықты тоқтатқан болатын. Түстен кейін сауда-саттық Франкфурт аукционы форматында өтті. Қазақстан қор биржасының басқарма төрағасының орынбасары Наталья Хорошевская сауда-саттықта ешқандай дүрлігу байқалмағанын айтты. Ал Ұлттық экономика министрінің бірінші орынбасары Тимур Жақсылықов валюта бағамы тұрақтайды деп болжам жасады. Бірақ қашан екені белгісіз.
Тимур Жақсылықов – Ұлттық экономика министрінің бірінші орынбасары:
“Ұлттық банк қажетті шараны қабылдады, оны көріп отырсыздар. Бүгін таңертең ақпарат таратылып, сауда-саттық қалай жүргізілетіні жарияланды. Менің ойымша, бастапқы кезеңде қандай да бір спекулятивті реакция болса да, кейіннен бағам тепе-теңдік сипатына дейін төмендейтін болады”.
