Дизель отынының тапшылығы – халықты әбден әбігерге түсірді. Әсіресе, ауыр жүк көлік жүргізушілерінің қалтасын қағуда. Тіпті, кейбір жанармай құю бекеттерінде дизель майы атымен жоқ. Солярка бағасының бірден өсуіне не себеп? Энергетика министрлігі қандай шара қолданбақ? Тілшіміз Әлия Мұхтарқызы зерттеп көрді.
Балаларының несібесін осы жүк көлігімен тауып отырған Әбдірахман Абылазовтың бұл іспен айналысып жүргеніне 6 жыл. Апталап алыс жолға аттанатын азамат: «ас-ауқатым болмаса да, жанармайым діттеген орныма жеткізсе, сол бір – бақыт», – дейді. Дизельмен ғана жүретін жүк көлігінің иесіне отын тапшылығы қиын боп тұр. Себебі аймақтағы жанармай бекеттерінде бірнеше күннен бері сұйық отын жоқ. Барлары тек талонмен болмаса, тым қымбатқа сатып жатыр.
Әбдірахман Абылазов, Шымкент қаласының тұрғыны:
«Солярка жоқ. Қазақстанның өзінен шығып тұрса да жоқ. Талонмен де құймайды. Өз бағамы – 208 теңге, талонмен 260 теңгеге сатылады. Өзімізден шықса да, жанармайға жарымай отырмыз».
Жанармай бекеттерінің меңгерушілері жоғары жақтан бекітілген бағамен ғана сатамыз деп қысқа қайырды.
Батырхан Абдуллаев, жанармай бекетінің меңгерушісі:
«Біз Газпром қойып берген бағамен сатамыз. 1 литрі – 208 теңге. Қазір келісімшартқа отырған компанияларға ғана беріп отырмыз. Оларға тауып беруге міндеттіміз»
Ал, Энергетика министрлігінің Павлодар зауытының күрделі жөндеуіне қатысы болжамы орындалмай отыр. Ол зауыт жөнделгенге дейін дейін жеткілікті қор жинап аламыз деп ойлапты. Алайда дизель отынына сұраныс өскен соң, 210 мың тонна ғана қор қалды дейді.
Әсет Мағауов, ҚР Энергетика вице-министрі:
«Павлодар зауытының тоқтауы республика бойынша дизель отыны балансына әсер етті. Біз 100 мың тоннаға жуық дизель отынын Ресейден импорттау керек екенін байқап отырмыз. Ресейдегі әріптестерімен келіссөз жүргізудеміз. Соның арқасында Қазақстанға дизель отынын жеткізу бойынша уағдаластыққа қол жеткізілді. Дизель отынын тұтыну жағынан да рекорд орнатылған. Тамыз айында сұраныс 519 мың, қыркүйекте 500-518 мың тоннаны құраған»
Түйін: Дизель отынын тұтынудың рекордтық өсіміне бағасының төмендігі басты себеп екен. Мағауоватың сөзіне сенсек, қордағы отын шамамен 11-12 күнге жетеді. Ал, Павлодардағы зауытындағы жөндеу жұмыстары қазан айының соңында аяқталуы тиіс. Сол кезде отын өндірісі реттелмек. Демек, соляркамен жүретіндерге әлі де сабыр сақтай тұруына тура келетін сияқты.
