Индустриалды аймақтардың 70 пайызының жағдайы мүшкіл. Облыстық инвестиция және экспорт басқармасының басшысы Қайрат Әзімов осылай дейді.
Шенеуніктің айтуынша, уақытында қыруар қаржы жұмсалып іске қосылған нысандарға шетелдік инвесторларды әкеліп таныстырудың өзі ұят көрінеді. Кейбірі жұмысын толық аяқтамаған. Ал, өзгесінде электр жабдықтары қолды болып кеткен.
Айта кетейік, Түркістан облысында 9 индустриалды аймақ құрылған. Жалпы аумағы 698 гектар. Оларға қажетті инфрақұрылымды жүргізу үшін бюджеттен 8 млрд теңгеге жуық қаржы бөлінген.
Қайрат Әзімов, облыстық инвестиция және экспорт басқармасының басшысы:
«Тоғыз индустриалды аймақтың 70 пайызы өте мүшкіл жағдайда. Оның ифрақұрылымынан бастап басқа да проблемаларын көтерсек, біраз талқылаймыз. Индустриалды аймаққа инвестициялық жобаларды орналастыра алмасақ, онда неге ашылды олар. Кезінде сонша қаражат бөлінді оларға. Қазір аудан деңгейінде шешілмеген біраз сұрақтар бар. Оған бірақ әкімдіктерін кінәлауға да болмайды».
