Бүгін футболдан Қазақстан кубогының ширек финалы өтеді, деп хабарлайды ҚазАқпарат.
Аталған турнирдің топтық кезеңі 14 тамызда мәресіне жетті. Нәтижесінде ширек финалға шыққан сегіз команда белгілі болды.
Жеребе тарту рәсімінде командалар өзара жұп құрады. Бұл кезеңде жеңімпазды анықтау небәрі бір ғана ойыннан тұрады.
Бүгін, ширек финалда сағат 19:00-де «Қайрат» (Алматы) пен «Ақжайық» (Орал), «Тараз» бен «Шахтер» (Қарағанды) командалары жасыл алаңға шығады.
Ал 21:00-де «Астана» (Нұр-Сұлтан) мен «Мақтаарал» (Түркістан облысы), «Қайсар» (Қызылорда) мен «Ордабасы» (Шымкент) командалары кездеседі.
Айта кетсек, жартылай финал ойындары 19 қазанға белгіленген. Кубок жеңімпазы 12 қарашада анықталады.
Қазақстан кубогы 1992 жылдан бері тұрақты түрде өткізіліп келеді. Бүгінге дейін аталған кубокты «Қайрат» 10 мәрте төбесіне көтерді.
