Түркістан облысында балалар үйінің басшылары мен қызметкерлері мемлекет қаржысын талан-таражға салып, миллиондаған шығын келтірген. Мұндай заңбұзушылықты өңірдің Экономикалық тергеп-тексеру департаменті қызметкерлері әшкереледі.
Мемлекеттің қамқорлығына алынған мекемелередің үш жылдық жұмысына тексеру барысында ондағы басшылардың тамақтан бастап тұрмыстық заттардан, тіпті көмірден де пайда тапқанын анықтаған. Күнделікті тұтынатын заттары мен азық-түлік бағасын қымбат қылып көрсеткен. Ал, қарттар үйінде көмірді артығымен алып, бірақ мекемені мардымсыз жылытып отырған. Бүгінде оның директоры мен есепшісі қылмыстық жауапкершілікке тартылуда.
Нұрдәулет Ергешов, Түркістан облысы бойынша экономикалық тергеп-тексеру департаментінің басқарма басшысы:
«Балалар үйлері мәселен бір ручканы 100 теңгеден алудың орнына 900 теңгеден алып отырған. Осы тектес негізсіз шығындарға жол берген. Жөндеу жұмыстары кезінде де сапасыз материал қолданып, оларды қымбат бағамен көрсетіп отырған. Ал қарттар үйінің директоры мен есепшісі 38 млн теңгені жымқырғаны үшін тергеліп жатыр. Олар тіпті қылмыстық істі жауып тастау үшін пара ұсынып, ол бойынша да қылмыстық жауапкершілікке тартылуда».
