Елордада кәсіпкер алаяққа 36 млн теңгесін беріп қойды, деп хабарлайды Turkistanzaman ҚазАқпаратқа сілтеме жасап.
«Нұр-Сұлтан қаласының Полиция департаменті «Алматы» ауданы полиция басқармасының криминалдық полиция бөлімі қызметкерлері алаяқтық жасады деген күдікпен 33 жастағы ер адамды ұстады.
Елордалық полиция қызметкерлері жедел-іздестіру іс-шараларын жүргізу барысында қаскүнемді Алматы қаласында қолға түсірді», – делінген Полиция департаментінің мәліметінде.
Ұсталған күдікті екі ЖШС басшыларының арасында туындаған сот процесін шешіп беруге уәде еткені анықталды. Ол заңгер қызметін көрсету желеуімен сенімге кірген. Сот процесін жәбірленушінің пайдасына шешіп беретінін айтып, фирма директорының 36 млн теңге көлеміндегі ақшасын иемденген.
«Аталған факті бойынша ҚР Қылмыстық кодексінің 190-бабы бойынша сотқа дейінгі тергеу амалдары жүргізілуде. Ұсталған адам қамауда.
Нұр-Сұлтан қаласының Полиция департаменті алаяқтардың құрбаны болмау үшін азаматтарды қырағы болуды, бейтаныс адамдарға сенбеуді ескертеді», – деді полициядан.
