Астанада 20 жастағы жігіт мұнаралы краннан құлап, мерт болды, деп хабарлайды turkistanzaman ҚазАқпарат сайтына сілтеме жасап.
Бұл жайында Өнеркәсіптік қауіпсіздік комитетінің Нұр-Сұлтан қалалық департаментінен мәлім етті.
«Осы жылдың 28 тамызы күні шамамен сағат 10:15-те Нұр-Сұлтан қаласының Есіл ауданында, Тұран даңғылы, 65 мекенжайында орналасқан Сауран құрылыс нысанында (бас мердігері «Абылай құрылыс» ЖШС) қайғылы оқиға болғаны туралы хабар түсті. Осыған орай Өнеркәсіптік қауіпсіздік комитетінің Нұр-Сұлтан қалалық департаменті инспекторы оқиға орнына шұғыл барды. Жұмыс барысында 2002 жылы дүниеге келген оператордың мұнаралы кранның басқару кабинетінен құлағаны (7-ші қабат биіктігінен) анықталды. Ол алған жарақатынан оқиға орнында қаза тапты», – деп атап өтті департаменттің баспасөз қызметі агенттік тілшісінің сауалына орай.
