ҚР Денсаулық сақтау министрі Алексей Цой вакцина алғаннан кейін коронавирустан қайтыс болғандар санын жария етті, деп хабарлайды ҚазАқпарат тілшісі.
«Жалпы, коронавирус инфекциясынан 4 969 адам, оның ішінде вакцина алған 115 адам қайтыс болды. Яғни, бұл жалпы қайтыс болғандардың 2,5 пайызын құнрайды. Қайтыс болғандардың басым бөлігі, 97,7% вакцина алмағандар. Бізде өңір аралық мәлімет те бар.
Вакцина алғанымен қайтыс болған адамдарда созылмалы аурулар болған. Дәл осы жайт олардың жай-күйлерінің нашарлауына және өмірден озуына себеп болған», – деді министр Орталық коммуникациялар қызметіндегі баспасөз мәслихатында.
Оның атап өтуінше, созылмалы аурулары бар азаматтарға вакцина алуға кеңес беріледі. Өйткені, олар қатер төнетін топқа жатады. «Бірақ, тағы да қайталап айтқым келеді, қайтыс болған азаматтардың басым бөлігі вакцина алмаған. Күрделі аурулардың барлығы семіздік, қант диабеті, жүрек-қан тамыр жүйесіндегі, тыныс алу жүйесіндегі ауруларға байланысты»,- деді министр.
Осы ретте министр вакцина алғаннан кейін қай өңірде қанша адам өмірден озғанын да атап өтті. «Қазақстанда вакцинациядан кейін 115 адам қаза тапты. Ақмола облысында – 2, Ақтөбе облысында – 5, Алматы облысында – 3, Алматыда – 17, Атырау облысында – 1, Шығыс Қазақстан облысында – 1, Жамбыл облысында – 6, Батыс Қазақстан облысында – 4, Қарағанды облысында – 9, Қостанай облысында – 1, Қызылорда облысында – 2, Маңғыстау облысында – 2, Нұр-Сұлтанда – 32, Павлодар облысында – 2, Солтүстік Қазақстан облысында – 1, Түркістан облысында – 0, Шымкент қаласында 27 адам», – деді Алексей Цой.
