Абай шахтасындағы апаттан 6 адам көз жұмды. Оқыс оқиғаның жойқын болғаны соншалық, қаза тапқандар құтқару құралдарын пайдаланып та үлгермеген. Тағы екі адам ауыр халде ауруханаға жеткізілді. Төтенше жағдайдың себеп-салдары жөнінде толығырақ тілшіміз Қасым Хабибулла тарқатады.
Қайғылы оқиға жексенбі күні таңғы сағат 8-ден 24 минут өткенде болған. Метан газдың шамадан көп бөлінуі салдарынан 6 азамат көз жұмған. Мерт болғандардың ең жасы 31-де болса, үлкені – 53 жаста. Бүгінде ел Президентінің тапсырмасымен оқиға орнында мемлекеттік комиссия жұмыс істеп жатыр.
Талғат Уәли, ҚР ТЖМ ресми өкілі:
«Оқиға болған сәтте 64 адам жұмыс істеп жатқан. Қайтыс болған 6 адам метан газының тараған ошағында болған. Тағы екі адам шахтаға кіре беріс маңайында болғандықтан, қорғаныс құралдарын киіп үлгерген. Сондықтан аман қалған. Ал, қайтыс болған алты адам тіпті ештеңеге үлгермей қалған».
Қазір оқиға орнында ауаны сорып, газсыздандыру жұмыстары жүріп жатыр. Түрлі ведомства өкілдерінен құралған мемлекеттік комиссия мүшелері тексеру айқын әрі әділ өтеді деп сендіруде. Сонымен қатар, зардап шеккендердің отбасыларына барлық тиесілі көмек көрсетілетінін айтады.
Юрий Ильин, ҚР Төтенше Жағдайлар министрі:
«Барлық зардап шеккен отбасыларға еңбек шартына сәйкес 10 жылдық жалақы төленеді. Сонымен қатар, несиелерін өтеп беру, 18 жасқа толмаған студент балаларының оқу ақысы төленеді. Және компания тарапынан баспанасы жоқ азаматтарға үй алып беру мәселесі қаралуда».
Естеріңізге сала кетейік, Абай шахтасында осыған дейін 2008 жылы үлкен жарылыс болған еді. Ол кезде 30 адам көз жұмған. Алайда, оның 7-еуінің ғана денесі сыртқа шығарылған. Қалғаны жағдайдың күрделілігіне байланысты жер астында қалып қойды. Жалпы, 1994 жылдан бастап кейбір мәліметтерге қарағанда еліміздегі шахталарда болған жарылыстардан 122 адам мерт болған.
