2025 жылдың 16 мамыр күні Шардара ауданындағы «Қасиет» әлеуметтік қызметтер көрсету орталығында «Қазақтың зергерлік бұйымдары» тақырыбында танымдық дөңгелек үстел өткізілді. Іс-шараның мақсаты – ұлттық зергерлік өнердің мәні мен маңызын дәріптеу, жастар мен қарт буын арасындағы сабақтастықты нығайту, ұлттың рухани-мәдени құндылықтарын ұлықтау.
Шара барысында орталықтың қызмет алушы зейнеткер аналары қазақ зергерлік өнерінің тарихы мен дәстүрлері туралы кеңінен баяндап, әр әшекей бұйымның шығу төркініне, қолданылу ерекшеліктеріне, эстетикалық және емдік қасиеттеріне жеке-жеке тоқталды.
Атап айтқанда:
• Бойтұмар (тұмарша) – адамның бойын түрлі жамандықтан сақтайтын ырымдық зат ретінде сипатталды.
• Жүзік пен сақина – тек сәндік бұйым емес, рухани, отбасылық мәні бар зергерлік мұра.
• Шолпы, шашбау, шаш теңге – қыз-келіншектердің шашына тағылатын әрі сәндік, әрі тәрбиелік мәні зор бұйымдар.
• Білезік – сом темірден құйылып, ашпалы-жаппалы, тастан безендірілген зергерлік бұйым ретінде егжей-тегжейлі таныстырылды.
• Сырға, қапсырма, алқа (өңіржиек) – қазақ әйелдерінің күнделікті және тойлық сәндік әшекейлері ретінде түрлі атаулар мен үлгілерде жасалған.
Дөңгелек үстелде зергерлік бұйымдардың алтын мен күмістен жасалуының денсаулыққа оң әсері туралы да айтылды. Қатысушылар ұлттық әшекейлердің тек сән үшін ғана емес, терең мағына мен тәрбиелік мәнге ие екенін атап өтті.
Шара соңында қатысушыларға ұлттық мұраға деген құрметті арттыратын осындай кездесулердің тәрбиелік және танымдық маңызы зор екені айтылып, алғыс білдірілді.
Шардара ауданы әкімінің баспасөз қызметі
