Шардара ауданында «Таза Қазақстан» экологиялық бағдарламасы аясында сенбіліктер мен экологиялық шаралар жүйелі түрде жалғасын табуда. Наурыз айынан басталған “Таза бастау”, “Жасыл толқын”, “Таза табиғат”, “Киелі мекен” атты кезеңдер аясында аудан көлемінде ауқымды жұмыстар жүргізілуде.
Атап айтқанда, Шардара су қоймасы, Ұзын ата кесенесі және қала мен ауыл округтерінің ішкі-сыртқы аумақтарында шөптер шабылып, аяқ жолдар ретке келтірілуде. 2025 жылдың қаңтар-мамыр айлары аралығында тазалық жұмыстарына 22 980 адам қатысып, 578 тоннаға жуық тұрмыстық қалдық арнайы полигонға шығарылған.
Бүгінгі өткен сенбілікке аудан мекемелері, еріктілер, қоғамдық жұмысшылар мен тұрғындардан құралған 1000-нан астам адам қатысып, 34 арнайы техника жұмылдырылды. Нәтижесінде 38 тонна қоқыс шығарылып, арнайы орындарға жеткізілді.
Сонымен қатар, көгалдандыру шаралары шеңберінде көктемгі кезеңде 20 150 түп ағаш көшеті отырғызылды. Аудан аумағындағы облыстық маңызы бар Шардара–Келес, Шардара–Жетісай және Шардара–Арыс бағытындағы автожолдар бойында тазалық жұмыстары жүргізіліп, нәтижесінде 103 шақырым аяқ жолдар мен 183 шақырым ирригациялық жүйелер тазартылды.
Бұл бастамалар аудан экологиясын жақсарту мен тұрғындарға қолайлы орта қалыптастыруға бағытталған жүйелі жұмыстың бір бөлігі болып табылады.
Шардара ауданы әкімінің баспасөз қызметі
