Қазақстан Республикасы Президентінің 2022 жылғы 3 наурыздағы №826 Жарлығына сәйкес, Шардара ауданының әкімі Арман Қарсыбаев 2025 жылдың алғашқы үш айында атқарылған жұмыстар туралы халыққа есеп беру кездесулерін бастады.
Аудан басшысы Ұзыната, Көксу, Қоссейіт, Қ.Тұрысбеков және Жаушықұм ауылдық округтерінде өткен кездесулерде аудан көлемінде атқарылған жұмыстар мен алдағы жоспарларға тоқталды. Ауылдық округ әкімдері де үш айда атқарылған жұмыстар бойынша есеп беріп, болашақта іске асырылатын жобалармен бөлісті. Кездесу аясында тұрғындарды жеке қабылдау ұйымдастырылды.
Кездесу барысында тұрғындар бірқатар әлеуметтік мәселелерді көтерді. Атап айтқанда, Қ.Тұрысбеков ауылдық округіндегі Ш.Уәлиханов мектебіне жөндеу жүргізу, Қоссейіт ауылындағы жекеменшік мектептердегі төлемақы мәселесі және өзге де өзекті сұрақтар қаралды.
«Кездесудегі басты мақсатымыз – халықпен ашық пікір алмасып, ауылдағы нақты мәселелерді бірге талқылау. Ауыл шаруашылығы – аудан экономикасының негізі. Сол себепті жерді тиімді пайдалану мен ауыл инфрақұрылымын дамыту жұмыстарын жалғастырамыз. Әр тұрғынның мәселесі – біз үшін маңызды», – деді аудан әкімі Арман Қарсыбаев.
Сонымен қатар, әкім әр елді мекендегі проблемалық жағдайлардан хабардар екенін айтып, олардың шешу жолдарын және мерзімдерін түсіндірді.
(с) Шардара ауданы әкімінің баспасөз қызметі
