Шардара ауданында дін саласындағы тұрақтылықты қамтамасыз ету және рухани құндылықтарды кеңінен насихаттау мақсатында аудандық мәдениет үйінің қызметкерлерімен «Дін және мәдениет», «Ұлтаралық және дінаралық татулық» «Рухани құндылықтарының дамуы мен ел тарихын, салт-дәстүрі» тақырыптарында ақпараттық-түсіндіру кездесуі өтті.
Кездесуге аудандық ақсақалдар кеңесінің төрағасы Қ. Ілесов, аудандық ішкі саясат бөлімінің әдіскері, теолог маманы А. Данияров, аудандық мәдениет үйінің қызметкері С. Бегманов және мәдениет саласының қызметкерлері қатысты.
Жиында алғашқы болып сөз алған Қ. Ілесов еліміздегі конфессияаралық татулықты қамтамасыз етудің маңыздылығына тоқталды. Оның айтуынша, бүгінгі таңда Қазақстанда 18 конфессия және 3800-ден астам діни бірлестік өзара бейбітшілікте қызмет атқаруда. Бұл – Қазақстанның көпконфессиялы ел ретінде дінаралық келісім мен толеранттылықты алдыңғы орынға қойғанының көрінісі.
– Қазақстан Республикасының Конституциясы мен «Діни қызмет және діни бірлестіктер туралы» заңы әр азаматтың ар-ождан бостандығына кепілдік береді. Мемлекетіміз дін саласында бейтарап, зайырлы бағытты ұстана отырып, ханафи мәзһабындағы ислам мен православие христиандығының рухани мұрадағы тарихи рөлін таниды және өзге дін өкілдеріне де құрметпен қарайды, – деп атап өтті Қ. Ілесов.
Өз сөзінде теолог маман А. Данияров дін мен мәдениеттің өзара байланысы туралы терең талдау жасады. Оның айтуынша, мәдениет – адамның ақыл-ойымен, танымымен, рухымен қалыптасатын құндылықтар жүйесі. Қазақ мәдениетіндегі рухани тұғырлардың қалыптасуына ислам діні мен Құран ілімдерінің ықпалы зор болғанын тілге тиек етті.
– Қасиетті Құран Кәрім мәтіндеріне салыстырмалы сараптама жүргізу арқылы қазақ мәдениетіндегі рухани құндылықтар мен ислам діні арасындағы байланыс айқындала түседі. Қазақстанда дәстүрлі исламды сақтап, радикалды, жат ағымдардың алдын алу – басты міндеттеріміздің бірі. Бұл ретте мәдени-ағартушылық шаралар мен діни танымды арттыру жұмыстары үлкен рөл атқарады, – деді А. Данияров.
Іс-шара қорытындысында қатысушылар дін мен мәдениеттің үйлесімділігі қоғамдағы бейбітшілік пен тұрақтылықтың негізі екенін атап өтіп, мұндай кездесулердің жиі ұйымдастырылуы қажеттігін жеткізді.
