«Мемлекеттік туды қорлағандарға жазаны қатаңдату керек». Сенатор Нұртөре Жүсіп палатаның жалпы отырысында премьер-министр Әлихан Смайыловқа осылай деп депутаттық сауал жолдады.
Мұндай ұсынысты «Ирина Кайратовна» тобының концертіндегі шуға байланысты жасаған. Осыдан кейін әншілердің бірі тек кешірім сұрап, айыппұл төлегенін айтты. Дегенмен депутат олардың жеңіл құтылып кеткенін айтып, мұндай оқиғалар үшін жауапкершілікті қатаңдату маңызды екенін жеткізді.
Естеріңізде болса, жақында Алматыдағы спорт сарайында «Ирина Кайратовна» жастар тобы мен әнші Shiza концерті қоғамда үлкен дау тудырды. Әртістердің сахнада өз-өзін ұстауы, көк туға деген құрметі халықтың ашуына тиді. Шулы оқиғадан кейін мемлекет басшысы Қасым-Жомарт Тоқаев мемлекеттік туды пайдалану тәртібін қайта қарау керек деген болатын.
Нұртөре Жүсіп, ҚР Парламенті Сенатының депутаты:
- Қылмыстық кодекстің 372-ші бабы бойынша «Қазақстан Республикасының рәміздерін қорлау – 2000 айлық есептік көрсеткішке дейінгі мөлшерде айыппұл салуға, не сол мөлшерде түзеу жұмыстарына, не 600 сағатқа дейінгі қоғамдық жұмыстарға тартуға не 2 жылға дейінгі мерзімге бас бостандығын шектеуге, не сол мерзімге бас бостандығынан айыруға жазаланады. Әдетте концертті кімдер ұйымдастырды? Қалтасында қомақты қаржысы барлар өткізеді. Оларға мына мөлшердегі айыппұлды төлей салу түкке тұрмайды»Мәдениет министрлігі жанынан репертуарлық алқа мен республикалық және аймақтық Көркемдік кеңестер құрылуы керек. Бұқаралық мәдени шараларды өткізу мен жүргізу талаптарына халықтың салт-дәстүрі мен әдеп-ғұрпын сақтау мен сыйлау ережелерін енгізуді ұсынамын. Осы талаптарды бұзған шығармашыл ұйымдар мен әншілердің қызметіне 5 жылға дейін шектеу қойуды талап етеміз.
