Шымкенттегі перзентхана жанындағы дәріханада болған жарылыстан зардап шеккен екі адам әлі жансақтау бөлімінде жатыр. Олар медициналық мекеменің санитарлық қызметкері. Сондай-ақ апаттан тағы 5 адам жарақат алған. Түркістан облыстық денсаулық сақтау басқармасы өкілдері «Науқастардың өміріне қауіп жоқ» — дейді. Ал арнайы құрылған комиссия жарылыс шығынын есептеп жатыр.
Күндізгі сағат 11:36 кезіндегі жойқын жарылыс Шымкент қаласындағы перинатальдық орталықты дүр сілкіндірген еді. Жарылыс ошағы –перзентхананың дәл іргесінде дәріхана ғимараты. Оқыс оқиға кезінде медициналық мекемеде 65 қызметкер мен екі жүзге тарта науқас болды. Құтқарушылардан бұрын олардың туыстары сол маңға бірінші жеткен.
Света Қойбағарова — Қала тұрғыны:
«Қызым осы роддомда жұмыс істейді. Машинам жанып кетті деген соң жүгіріп келдім. Бірақ, кіргізбей жатыр. Қызыма не болып жатқанын да білмеймін ғой».
Жарылыстан медициналық мекеменің күзетшісі мен жұмысшысы және жаңа туған нәресте қайтыс болды. Көз жұмған сәби осыдан 18 күн бұрын дүние есігін ашқан үшемнің бірі екен. Мамандардың болжамы бойынша ғимарат ішіне газдың жиналып қалуы төтенше жағдайға себеп болуы мүмкін.
Мадияр Жақсыбаев – Шымкент қаласы төтенше жағдайлар департаментінің басшысы:
«Перекис водорода соның ішінде болған. 12 литр эмкостьте шамамен сол мекеменің басшысының айтуы бойынша 2 тоннадай перекис водорода болған. Ол перекис водородадан арнайы фурацилин, глюкоза деген дәрі-дәрімектер жасалған. Бүгін ешкім жұмыс жасамаған. Есік құлталу,- дейді. Бірде – бір қызметкер болмаған».
Облыстың бас дәрігері зардап шеккендерге қажетті материалдық көмек көрсетілетінін жеткізді. Қайтыс болған азаматтардың отбасына қаржылай қолдау болады және несие қарыздарын өтеу мәселесі де қарастырылады деді жауаптылар. Ал жарақат алған 7 адам түрлі дене жарақатымен ауруханада жатыр. Олардың ішінде ғимаратқа интернет желісін жүргізуге барған мамандар да бар.
Мағрипа Ембергенова — ҚР ДСМ ана мен бала денсаулығын қорғау департаментінің директоры:
«Барлық науқастар жағдайы тұрақты. Керекті медициналық көмектің барлығы жасалған. Ешқандай шағымдары жоқ. Әрі қарай керекті медициналық көмек керек жағдайда республикалық клиникалардан көмек береміз».
Марат Пашимов — Түркістан облысы денсаулық сақтау басқармасының басшысы:
«Кімді қайда апарады, кім қайда қаралады? Оның бәрі шешілді. Тағы қосымша айтсам, Түркістан облысының тұрғындары мен Шымкент қаласының тұрғындарына кедергі жасамаймыз. Бізге қарасты тағы екі қосымша перинаталды орталық бар. Ол Түркістанда, екіншісі қалада және қосымша облыстық клиникалық аурухана бар. Гинекологияға қарасты облыстық аурухана бар. Және балдардың облыстық ауруханасы бар Шымкентте».
Облыстық №1 перинаталды орталық уақытша жұмысын тоқтатты. Қазір барлық материалдық шығын көлемі есептеліп жатыр. Ал болған оқиғаға байланысты полиция қылмыстық іс қозғады. Заң бойынша оған кінәлілер 2 жылдан 7 жылға дейін бас бостандығынан айырылады. Сонымен қатар жеке кәсіпкерге қатысты прокуратура тергеу жүргізуде. Ол кәсіпкерлік қызметіне байланысты лицензиясынан айырылуы мүмкін.
