Кеше Мемлекет басшысы Қасым-Жомарт Тоқаев Ресей Президенті Владимир Путинмен кездесті. Қос мемлекет басшысы екі ел арасындағы экономикалық ынтымақтастықты арттыру жайын сөз қылды. Елімізде ресейлік инвесторлардың қатысуымен машина жасау, металлургия, химия өнеркәсіп салалары бойынша 20 ірі жоба іске асыруда. Аталмыш бастамалар 4 миллиард долларды құрайды. Бұдан бөлек өзекті мәселелерді пысықтаған Тоқаев пен Путин биыл күзде Орынборда өтетін Аймақаралық форумда талқылауға келісті.
Қасым-Жомарт Тоқаев – Қазақстан Республикасының президенті:
«Шын мәнінде, елдеріміз арасындағы сауда-экономикалық және саяси ықпалдастықтың қарқыны нашар деуге еш негіз жоқ. Тауар айналымы 25 миллиард долларға жетті. Ресей – Қазақстан үшін сауда-экономикалық саладағы басты серіктес. Сол себепті, мен, Үкіметімізге осы қарқынды және сауда мен инвестициялар көлемін сақтап қана қоймай, қазіргі геосаяси жағдайдағы барлық қиындықтарға қарамастан оларды арттыру жөнінде міндет жүктеймін».
Владимир Путин – Ресей федерациясының президенті:
«Жалпы бізде барлық сала жақсы дамып келеді. Былтыр тауар айналымының өсімі 34 пайыз болды. Ресей компаниялары Қазақстан экономикасына 17 миллиард доллар инвестиция салды. Бәрімізге түсінікті әрі белгілі қазіргі қиыншылықтарға қарамастан, жағдай жақсы дамуда».
