Қазақстанда 1,5 миллион адамның проблемалық несиесі бар. Тағы 500 мыңға жуық азаматтың қарызы коллекторлық компанияларға өтіп кеткен. Жағдайды реттеу үшін мұндай жұмыс істемейтін несиелерді енді сервистік компаниялар мен жеке инвесторларға беру көзделіп отыр. Тиісті заң жобасы бүгін Мәжілісте қаралды. Құжат аясында азаматтардан кепілдік есебінде өндіріп алған мүлікті ары кеткенде 3 жыл ішінде сату міндеттелмек. Өйткені банктер мен микроқаржылық ұйымдар 5 жылға дейін өз меншігінде ұстайды екен. Одан бөлек коллекторлық мекемелерге де қойылатын талап күшейтілмек.
Мадина Әбілқасымова – ҚР Қаржы нарығын реттеу және дамыту агенттігінің төрағасы:
«2020 жылдан бастап банктер агенттіктің келісі бойынша стрестік активтерді азайту жөніндегі жеке жоспарларды әзірлеп, іске асырып жатыр. Екіі жыл ішінде 648 миллиард теңге проблемалы қарыздар есептен шығарылды».
Сондай ақ, мәжілісте депутаттар онлайн-кредит беруге тыйым салуды ұсынды. Себебі кепілпіз несиеге қол жеткізу оңай. Тіпті онда табыс көлемі есептелмейді. Сондықтан микроқаржы ұйымдарының проблемалық қарыздар үлесі жыл сайын артып келеді. Ал бас прокуратураның мәліметінше, соңғы 5 жылда кибер-қылмыс саны 10 есеге артқан.
Дәния Еспаева – ҚР Мәжіліс депутаты:
«Мерзімі өткен қарыздар – 479 мың қарыз алушы немесе жартысынан астамы коллекторлық компанияларға сатылды. Осылайша, микроқаржы ұйымдарының портфеліндегі проблемалық қарыздардың жалпы саны 914 мың немесе жартысынан астамын құрайды. Қазір ұлттық экономиканы несиелендіруді қысқарту, жұмыс орындары мен халық табысының өсуін тежеу жүріп жатыр. Жеңіл болып көрінетін интернеттегі несие берудің айла-амалдары да адамдарды құлдыққа итермелеуде».
