Мейрамда ракета жіберуден тайынбайтын оңбағандар. Осылай деген Украина Президенті Владимир Зеленский Ресейге кезекті рет шүйлікті. Украина басшысы, Киев метросында отандық және шетелдік ақпарат құралдарына сұхбат берді.
Соғыс аяқталғанға дейін елден кетпеймін. Баспасөз конференциясында осылай деген Владимир Зеленский біраз шетелдік журналистердің қитұрқы сұрақтарын шорт кесті. Мәселен Түркияға және Польшаға неге бармадың деген сұрақтар қойылған еді. Одан бөлек, ең жоғары деңгейде Ресей мен Украина басшыларының кездесуі қашан болады деген сұраққа да жауап қатты. Әсіресе, Түркиядағы кездесулер форматы жалғасады ма деген сауалдар болды.
Владимир Зеленский – Украина президенті:
«Менің ойымша бұл басқа Владимирге сұрақ. Путинге. Біздің топтардың кездесуі тікелей соған байланысты. Түркияны жақсы көреміз. Бірақ, қазір соғыс. Сондықтан, елден кете алмаймын. Бір күнге де. Ондай көңіл-күйіміз де жоқ».
Ал, күні кеше Одессаға жасалған шабуыл туралы сұрағанда эмоцияға бой алдырған Зеленский балағаттауға көшті. Оның айтуынша, православ христиандары үшін қасиетті пасхада осындай қылмысқа барған адамдар туралы басқаша айту мүмкін емес. Әсіресе, 3 айлық бүлдіршіннің өлімі туралы ақпарат бүкіл әлемді дүрліктірді.
Владимир Зеленский – Украина президенті:
«Оңбағандар. Менің басқа айтар сөзім жоқ. Қалайша, олар қасиетті Пасхада осындай қылмысқа барады. Құдайдан мүлдем қорықпайды ма сонда? Үш айлық қызды ойласам жүрегім ауырады. Соғыс басталғанда ол небәрі бір айлық еді. Оның Ресейге қандай қаупі бар еді? Балаларды өлтіру – Ресей Федерациясының жаңа ұлттық идеясына айналған болуы керек».
Ресей Каспий теңізінен Одессаға 7 қанатты ракета жіберген. Оның екеуін Украина Әуе Қорғаныс Кешендері сұлатып түсірген. Алайда, қалғандары қаланың тұрғын үйлеріне түсіп, 8 бейбіт адам мерт болды. Оның ішінде 2 бала. Марқұмдардың біреуі бар болғаны 3 айлық нәресте.
