Франциядағы президенттік сайлауда Макрон жеңіске жетті. Саяси доданың қорытындысы бойынша ол сайлаушылардың 58,55 процент дауысына ие болды. Осылайша Макрон – президенттік лауазымда екінші мерзімге сайланған Францияның үшінші президенті. Ал сайлауда Макронның басты қарсыласы Марин Лё Пен 41,45 процент дауыс жинап, жеңілгенін мойындады.
Эммануэль Макрон соңғы 35 жылда екінші мерзімге сайланған алғаш Президент аталды. Оған дейін бесінші республика тарихында тек Франсуа Миттеран ғана екі мерзім Елисей сарайын басқарған еді. Сайлау қорытындысы бойынша Макронның басымдығы айқын болғанымен, қос үміткердің күресі тартысты болды. Алайда, сайлаушылардың қатысу деңгейі бар болғаны 63,2 пайыз болған.
Эммануэль Макрон – Франция президенті:
«Соңғы 5 жылда көп өзгеріс болды. Жақсысы да, жаманы да. Бұрын-соңды болмаған дағдарыстарды көрдік. Дәл осы күні француздардың басым көпшілігі мемлекет басқаруды маған сеніп тапсырды. Ле Пенге дауыс бергендерге ешкім қысым көрсетпеуі тиіс. Себебі, мен енді үміткер емес, Президентпін және әр адам үшін жұмыс істейтін Президент боламын».
Елде 49 миллионға жуық азаматтың дауыс беру құқығы бар. Дегенмен осы жолы оның 63 проценті ғана сайлауға қатысқан. Ал сайлауда жеңіліс тапқан әсіре ұлтшыл «Ұлттық бірлестік» партиясының жетекшісі Ле Пеннің жақтастары Макрон тек байлардың қамын ойлайды деп байбалам салуда. Ле Пен болса, маусым айындағы парламент сайлауына дайындалып, сол жерде биліктегі коалицияға үлкен соққы жасайтынын жеткізді.
Марин Ле Пен – Франция президенттігіне үміткер:
«Маған бірінші турда қолдау білдіріп, екінші турда қосылғандарға алғысым шексіз. Мен өкінбеймін және болашаққа үмітпен қараймын. Осының өзі үлкен жетістік. Себебі, біз француз және еуропалық саясаткерлерге халықтың сенбейтінін ашық көрсеттік».
Президент сайлауының қорытындысы жариялана сала Париж көшелерін наразы топ басып алды. Полиция әдеттегідей көз жасаурататын газ қолданды. Ал, бір көлік жүргізушісі полицияның тоқта деген талабына бағынбағандықтан, тәртіп сақшылары оқ жаудырып, көліктегі 2 адам қаза тапты.
