Ресей әскері Донбассқа шабуылды бастады. Бұл туралы Украина президенті Владимир Зеленский мәлімдеді. Оның сөзінше, Украина бақылауындағы Краматорск пен Славянск қалаларына әуе шабуылы жасалған. Сонымен қатар, ел батысындағы Львовтағы әскери нысанды атқылады. Тағы бір маңызды жаңалық Мариупольде «Азов» батальоны қарсы шабуылға шықты.
Украинаны қарусыздандырамыз деп соғыс ашқан Ресей Донбассты басып алу үшін шабуылды бастады. Ресми Кремль біраз уақыттан бері әскерилерді шоғырландырып, сепаратистерді қаруландырып келген болатын. Себебі, Донецк пен Луганс облыстарындағы Украина әскери бөлімдері ең тәжірибелі саналады.
Александр Штупун – Украина қарулы күштер бас штабының ресми өкілі:
«Ресей Федерациясы Украинаға қарсы кең ауқымды агрессиясын тоқтатар емес. Донецк және луганск облыстарын толық басып алумен қатар, Қырыммен құрлық арқылы байланыстырмақ. Одан бөлек, Херсон облысына шабуыл жанданды. Александровка және Николаевка елді-мекендерін атқылап жатыр. Ол жерде әскери нысандар жоқ».
Мариуполь қорғанысын ұстап тұрған Азов батальоны өз сайтында видео жариялады. Онда Ұлттық Гвардия арнайы жасағының Ресей әскеріне және сепаратистерге қарсы шабуылға шыққанын көруге болады. Пентагон болса, Украина шығысына неғұрлым тез заманауи қару-жарақ пен техниканың жеткізіліп жатқанын мәлім етті.
Джон Кирби – АҚШ Қорғаныс министрілігінң ресми өкілі:
«Біз қазір украиналық әскерилерді заманауи қаруларды пайдалануға үйретеміз. Олар өз кезегінде басқа әріптестеріне үйретпек. Мен сіздерге түсіндіре кетейін. Донбасс 8 жыл бойы соғыс болып келе жатқан жер. Осы ретте, объективті баға берсем, Украина әскеріне тәнтімін. Олар Донецк пен Луганск облыстарын қорғап қана қоймай, кейбір елді-мекендерді қайтарып жатыр».
Ресей бүгін Украинаның батысындағы Львовқа әуе шабуылын жасады. Ресми Кремль бұл әрекетін Батыс елдері және АҚШ-тан келген қару-жарақ қоймасын жоюды көздедік деп түсіндірген. Бірақ, әскери нысанның орнына бомба көшеге түсіп, қала мэры Максим Козицкидің айтуынша 6 бейбіт адамның адамның өмірін жалмады.
