Жаңбыр жауса пәтердің іші суға толады. Ал жел соқса электр сымдары үзіледі.
Түркістан облысы, Леңгір қаласының тұрғындары үрей құшағында отырғанын айтады. Қос қабатты сегіз үйдің іргесі 90 жыл бұрын салынған.Содан бері бірде бір рет жөндеу көрмепті. Бүгінде баспаналардың әбден тозығы жетіп, құлаудың алдында тұр. Үйлер екі жыл бұрын бұзылуы керек еді. Жергілікті билік оған қаржы жоқ екенін айтады.
Қаланың ортасында орналасқан бұл үйлердің қазір бүтін жері қалмаған. Қабырғасы ағаштан тұрғызылғандықтан іргетасы үгітіліп, шұңқырлар пайда болыпты. Едендері тозып, шіріп жатыр. Пәтерлерде су жоқ. Газ құбырлары тартылмаған. Жылу мен кәріз құбырлары да жоқтың қасы.
Ағаш пен қамыстың арасынан шыққан қандала бесіктегі балаға дейін тыным бермейді екен. Сонда да барар жері болмаған тұрғындар өлместің күнін көріп келеді. Уақыт өткен сайын бұл баспанада өмір сүрудің өзі қауіпті болып бара жатыр, дейді.
бір қызығы 115 пәтерлі үй әлі күнге дейін апатты деп танылмаған. Жауаптылар болса тұрғындардан төрт жыл бұрын құжаттарын жинап алыпты. Бірақ, одан да еш нәтиже болмай отыр.
Аулада балалар ойнайтын алаңша да жоқ. Тұрмыстық қалдықтарды тастайтын жәшік болмаған соң айналасы қоқысқа толып кеткен. Ал жергілікті билік өкілдері осы маңнан жаңадан бес қабатты 4 үйді салу үшін жоба жасаттық дейді. Бірақ оны салуға келгенде қаржы жоқ.
Шенеунік қаржының қашан бөлінетінін нақты айта алмады. Дегенмен ойын алаңшаларын салып, қоқыс жәшіктерді де жеткіземіз деп уәде етті. Бірақ, бұл жауапқа тұрғындар көңілі толмай отыр.
