Мариупольде Ресей әуе күштері белгісіз қару қолданды. Қаланың өндірістік аудандарында бекінген «Азов» батальоны мен аумақтық қорғаныс күштеріне қарсы сепаратистік Донецк Халық Республикасы басшыларының бірі Эдуард Басурин химиялық қару қолдану керек деген еді. Енді зауыттардың біріне 100 киллограмдық снаряд тасталған екен. Қуанышқа орай, одан зардап шеккендер жоқ. Бірақ, Украина билігі бұл снарядтың улағыш зат екенін айтып, дабыл қағуда.
Украина Президенті Владимир Зеленский Мариупольді қорғап жатқан полктердің позициясына улағыш зат атқыланғанын мәлімдеді. Бірақ, оны тексеру соғыс жүріп жатқанда мүмкін емес дейді. Мемлекет басшысының айтуынша, бұл үрдіс қайталануы мүмкін. Себебі, Донецк Халық Республикасының Ішкі Істер Министрі Эдуард Басуриннің айтуынша, зауыттардағы Украина күштеріне шабуыл қауіпті, өйткені олардың бекінген жері жақсы қорғалған, сол үшін химиялық қару қолдану керек деген болатын.
Владимир Зеленский – Украина президенті:
«Қазір біз жағдайды мұқият бақылап отырмыз. Марипольды қорғап жатқан күштерге қарсы улағыш снаряд тасталды деген хабар түсті. Осы соғыстың өзінде Ресей әскері тыйым салынған фосфорлы оқ-дәрі қолданғандықтан, біз таң қалмаймыз. Себебі, олардан барлығын күтуге болады. Халықаралық қауымдастық бұған жауап қатуы керек».
Пентагон болса, бұл туралы әлі ақпарат жинастырып жатқандығын және сол үшін толық растай алмайтындығын мәлімдеді. Джон Кирбидің айтуынша, егер ол ақпарат расталса, АҚШ Ресейге қысымды одан сайын күшейтеді.
Джон Кирби – АҚШ Қорғаныс министрлігінің ресми өкілі:
«Біз әзірге Мариупольде химиялық қару қолданылды деген ақпаратты растай алмай отырмыз. Бұл туралы мәлімет әлеуметтік желілерде пайда болған. Бірақ, біз жағдайды бақылауда ұстаймыз. Не болса да, Ресей жауапкершіліктен жалтара алмайды».
Сондай-ақ, Джон Кирбидің айтуынша Ресей бір ғана Киев төңірегіндегі әр елді-мекенде әскери қылмыс жасағандықтан, барлығын тергеп үлгермей жатыр.
