Украинада қыз-келіншектерді зорлау фактілері бойынша тергеу жүргізіледі. Бүгін Біріккен Ұлттар Ұйымының қауіпсіздік Кеңесінде АҚШ пен Албания осы мәселеге байланысты жиын шақырды. Естеріңізге сала кетсек, Ресей әскерінің украиналықтарға сексуалды зорлық-зомбылық көрсеткені туралы соңғы жарты айда көп айтылып келді. Қазір құқық қорғаушылар мен еріктілер дәлелдерді жинап жатыр.
Украинаның адам құқығы жөніндегі уәкілі Людмила Денисова Киев облысында әйелдер ғана емес балалар да зорланғанын айтады. Ол ВВС сайтына Ресей солдаттары Бучада 14-24 жас арасындағы 25 әйел мен қызды зорлағанын, арасында жүкті болып қалғандар барын жеткізді. Осыған орай, БҰҰ Қауіпсіздік Кеңесінің отырысында тергеу жүргізу мәселесі көтерілді. Ал Ресей болса, бұл айыптардың негізсіз екенін айтумен болды.
Сима бахус – «БҰҰ – әйелдер» бөлімінің басшысы:
«Біз зорланған әйелдер туралы жиі естіп жатырмыз. Ол фактілердің барлығы жіті тексерілуі тиіс. Ресей әскерінің бұл әрекеттері бірен-саран емес, кең көлемде болып жатқандықтан бұл тенденция бізді қорқытады. Кінәлілерді тауып жазасын беру керек».
Еуроньюс журналистіне атын атамауды өтінген мына келіншек Херсон облысынан қашып шыққан. Оның айтуынша, жалғыз үйіне қайтып келе жатқан кезде Ресей әскерлері жаппай бас салып, автоматпен қорқытқан.
Зорланған әйел:
«Мен үйіме жетуге сәл-ақ қалған еді. Оларды байқадым. Кейін үйге кіріп, есікті жабайын дегенде олар да баса-көктеп кіріп келді. Ештеңе деместен мені төсекке итеріп, автоматпен тұншықтырды».
Украина бас прокуратурасы «Ресей әскерилерінің қолынан қанша әйел мен бала зорлық-зомбылық көргені жайлы есеп жүргізу мүмкін емес, себебі зорланғандардың бәрі қазір басынан өткенін айта бермейді» деді. Қазір Украина бас прокуратурасында Ресей солдаттарының зорлық-зомбылық әрекеттеріне дәлелдер жинайтын арнайы жұмыс тобы құрылған. Олар бұл құжаттарды кейін Халықаралық қылмыстық сотқа бермек.
