Төбемізден жай түсіп, өлгенімізді күтіп отыр. Осылай деп ашынған Кентау қаласындағы апатты үй тұрғындары редакциямыздан араша сұрады. Халық арасында «Сталинка» деп аталып кеткен, екі қабатты үйдегі пәтерлердің қабырғалары әне-міне құлауға жақын. 2020-ы жылы үй апатты болып танылғанымен, тұрғындарға ешкім көмектесуге асығар емес.
Кентаудағы геноцид. Бұл жағдайды басқаша түсіндіру қиын. 2000-ы жылдардың ортасында бұл көппәтерлі тұрғын үйде алғаш проблемалар туындай бастаған. Бірақ, жергілікті құзырлы органдар бірден көмектесе қоймапты. Ат үсті қарағаны сонша, үй бір кездері қала балансынан жоғалып кеткен. Оны да тұрғындар әкімдік табалдырығын тоздырып жүріп қайта енгізген. Бұл үй тұрғындарының айтуынша, олардың жазған арызынан кітап жазуға болады.
Фархат Сатыбалдиева — Апатты үйдің тұрғыны:
«Осы үйлеріміз биылдыққа шыдайды ма, шыдамайды ма білмеймін. Қазірдің өзінде өзіміз үшін жөндеу жұмыстарын жасаймыз. Бір бөлмені жасасақ, екінші күні жарылып жатады».
70 жастағы Райхан Тірекова осы пәтерде жалғыз өзі тұрады. Бір өкініштісі, әжей бұл мәселенің шешілетінінен күдерін үзген. Өмірімнің соңын апатты үйде өткіземін бе деп қорқады. Олай деуге себеп жоқ емес. Жел тұрғанда үйдің қабырғалары біртіндеп түсетін көрінеді.
Райхан Тірекова – Апатты үйдің тұрғыны:
«Елдер 20 жыл, 30 жыл тұрады ғой. Енді менің жасым 70-ке келдім ғой. Мен ол кезекті күткенімен, Құдай білсін, мен ертең кетіп қалатын адаммын. Менің қан қысымым бар. 200 болады, 220 болады. Кейде құлап қаламын. Мен ол тамға жете алмаймын ғой, расын айтқанда».
Қалалық әкімдік тұрғындардың арыз-шағымына тұрақты түрде жауап қайтарады. Ол жауапта екі ұсыныс жасайды. Біріншісі, үй кезегіне тұру. Екіншісі, үй кезегі келгенше әкімдік төлейтін пәтерге көшу. Бірақ, оған тұрғындар келісер емес. Оған да келісейін десе, бір-екі ай төлеп, кейін әкімдік пәтерақыны төлемей орта жолда тастап кеткен жағдайлар болған екен. Әкімдік өкілдерінің айтуынша, көмектескісі-ақ келеді, бірақ заңдағы шектеулер кедергі келтіріп тұр. 2014-і жылдан бастап, апатты үйге өтемақы төлеу тоқтап қалған. Біздің қолымыз байлаулы дейді олар.
Қанат Қозбағаров – Кентау қаласы тұрғын-үй коммуналдық шаруашылық бөлімі басшысының міндетін атқарушы:
«Енді біз тұрғындарға жауап берілген, ұсыныс берілген. Апатты деп танылғаннан кейін тұрғындар апатты деп танылса ҚР заңына сәйкес сондай санат бар. Кезекке тұра алады. Осы үй апатты деп танылған. Кезекте 41 адам тұр. Өтініштерін тастап осы кезекке тұра алады».
Тұрғындар осы жолы да әкімдік көмектеспесе, Президентке үндеу жолдаймыз және сотқа шағымданамыз деп отыр.
