Сарыағаш ауданы Қызылжар ауылының тұрғындарын жолдың жайы, газдың мәселесі әбден қажытқан. Төңіректегілер түгел көгілдір отынның рақатын көріп отырғанда, олар әлі от жағып, күл шығарып жүр. Газдың құбырына, құжатына деп әкім әлдеқашан ақша жинап алған. Ал енді түрлі сылтау айтып, жұртты жанына жолатпайтын көрінеді. Тіпті шағымданып келгендерге шамданып: «қайда барсаңдар онда барыңдар? Билеттеріңді алып берем» депті.
Тұрғындар:
«Билет әперем деді. Нұр-Сұлтанға барасың ба? Тоқаевқа барасың ба? Кімге барсаң соған бар деді».
Даудың басы ауылдағы газ және жол мәселесінен басталған. Тұрғындардан қызметкерлер газ құжаттарын реттеп кіргізіп беру үшін 85 мың теңге жинап алған. Алайда, хабар ошарсыз кеткен. Алдына барса түрлі сылтау айтып шығарып салатын көрінеді.
Тұрғындар:
«Дат айтып барып жатырмыз сізге личный қалтаңнан ақша төле деп жатқан жоқпыз. Неге уақытында келмейді мына газ. Сол мәселені шешіп бер дедік болды».
Тұрғындардың ашынатыны сол өткен жылы әкімдіктегілер халықтан сүйінші сұрап, көмір алмаңыздар деп айтқан. Тіпті, құбыр кіргізуге құжат дайындау үшін ақшасына дейін жинап алған. Алайда, содан бері екі үш жыл өтті әлі қозғалатын түрі жоқ. Амалы таусылған тұрғындар отын алып, қи жағып қыстан шығыпты. Ал, жағдайы жеткендер көмір сатып алған.
Тұрғындар:
«3-4 тонна көмір алсаң 70-80мың болады. Біреудің жағдайы келеді. Біреудіңкі келмейді».
Оралбай Тойлыбаев – ауыл тұрғыны:
«Алдыңғы әкім декабрьде жағамыз деген. Мынаусы биыл декабрьде деді. Жылын сұрап алу керек еді қай декабрь екенін».
Мәселені айтып ауыл әкіміне барған сөйтсе,өздеріне дүрсе қоя беріпті. Тіпті, ұруға дейін барды дейді тұрғындар. Ол аздай халықтың жан-айқайын тыңдап,оны шешудің орнына, елордаға жолдама әперем депті. Халық жиылған соң билет әпергіш әкім де келді. Ол тұрғындармен арадағы әңгімені ашумен болғанын растады. Артық айтқан сөзі үшін көпшіліктен кешірім сұрады.
Әбдіжаппар Рақымбердиев- ауыл әкімі:
«Бір- бірімізге жаман әңгіме айтқан жоқпыз. Қатты айқай болған жоқ. Өтіп кетсе кешіріңіздер құдай қаласа 3-4 айдың ішінде кіргізіп береміз».
Сондай-ақ, Қызылжарда 25 көше асфальтсыз. Тұрғындар лай кешіп жүргендерінде айтады. Мемлекеттік сатып алу конкурсы өтсе биыл 13 көшенің 11 шақырымы жөндеуден өтеді-дейді жауаптылар. Жұмыстар 1-2 айда басталады.
