Кеңсе қағазы қымбаттады. Кей аймақтарда ақ парақтың құны бірден екі есе өсіп, 4 мың теңгеден саудалануда. Қағаз құнының бұлай шарықтауының негізгі себебі — тауар Ресейден келеді. Ондағы компаниялар түрлі санкцияларға байланысты қағаз ағартатын қоспалардан қағылған.
САУАЛНАМА: «Бұрын 1600 ден алып жүретінбіз. 4 мыңға алдым. Неге қымбаттап кеткен соны түсінбей жатырмыз? Бізге мұғалімдерге қажет қой бұл».
«Бұрын 1600 ден алатын едік. Қазіргі таңда 4 мыңға алады. Көтеріліп кетті ғой. Біз жақтағы магазинде. Көп жерде жоқ қалмапты».
Қағаз тарығып жатқандардың бірі Өркен Мырзабек. Оның журнал шығаратын баспаханасы бар. Қағаздың қымбаттауы отбасылық кәсібіне кері әсер етуде.
Өркен Мырзабек – Кәсіпкер:
«Мен өзімнің шығынымды ақтау үшін журналымның бағасын қымбаттатуым керек қой. Ал журналымды сатып алып жатқан адамдар менің қойған бағама келіспейді. Енді мен амал жоқ кәсібімді тоқтатуым керек не болмаса журналдың бағасын 2-3 есеге көтеріп, жарнамамды тартуым керек».
Сарапшы Мақсат Халықтың айтуынша, санкциялар бізде салынбаса да елімізге жанама әсерін тигізуде. Өйткені Ресейде кеңсе қағазын өндіру көлемі азайған.
Мақсат Халық – Сарапшы:
«Көптеген концелярлық тауарларды бүгінгі күні Қазақстанда А4 қағазына да тапшылыққа ұшырап жатқанын байқап отырымыз. Біздің үкіметіміз жылдам реакция жасау керек. Ресейден келетін тауарлардың тізімін жасап, оның орнына тапшылық орнайтын тауарлардың картасын құрып, сол тауарларды дереу өзге елдерден жеткізу жолдарын қарастыру қажет».
Ал сатушылар болса, көтерме саудагерлер берген бағаның үстіне небәрі 100 теңге қоямыз деп отыр. Күні кеше оларға кеңсе қағазы 3 мыңнан берілсе, бүгін 4 мыңға бағаланған.
Асанхан Ниязов – Сатушы:
«Көк қымбат ол. Қазір 3 мың дей ма сондай дейді. Біз алмай жатырмыз. Ол қымбат болып жатыр. Доллар қымбат дей ма. Анау мынау деп жатыр».
ҚР Индустрия және инфрақұрылымдық даму министрлігі:
«2021 жылдың қорытындысы бойынша А4 қаптамасының орташа көтерме бағасы 1,5 мың теңгені құрады. 2022 жылғы наурызға қарай бағалар орта есеппен бір мың теңгеге немесе 67%-ға өсті. Қазір ірі жеткізушілер кеңсе қағазының 1 қаптамасын 3 мың теңге көтерме бағамен саудалайды. Бағаның өзгеруі Батыс Еуропадан қағаз шикізатын ағартуға арналған реагенттерді жеткізудегі іркілістерге байланысты және РФ-да кеңсе қағазын өндіру көлемінің қысқаруына орай орын алып отыр».
Айта кетейік, елімізде А4 форматындағы қағазды кесу және орау бойынша 2 зауыт жұмыс істейді. Былтыр осы кәсіпорындар 600 мың қаптама қағаз шығарды. Ал еліміз өткен жылы кеңсе қағазының 61 процентін Ресей, 30 процентін Түркиядан сатып алған. Ал 8 пайызын Қытай елінен импорттаған.
