Украинадағы атыс уақытша тоқтауы мүмкін. Белорусьте өткен Ресей-Украина арасындағы келіссөздің екінші кезеңінде басқыншы тарап делегациясы осылай деп мәлімдеді. Себебі өкілдер қақтығыс аумағынан бейбіт тұрғындарды шығару үшін жасыл дәліз құрмақ. Бірнеше рет уақыты кейінге шегерілген жиын Нұр-Сұлтан уақытымен кешкі тоғызда басталды.
Келіссөз залында делегациялардың қол алысуының өзі бүкіл әлемді қуантты. Бұл жақын арада соғыстың тоқтауы мүмкін деген үміт сыйлады. Тараптар өздері қалағандай ұрыс қимылдарын тоқтату туралы келісе алмады. Алайда, Соғыс жүріп жатқан елді-мекендердегі бейбіт тұрғындар үшін «Жасыл дәліз» ашуға уағдаласты. Ол үшін екі елдің қорғаныс министрлігі арнайы байланыс каналын ашады.
Владимир Мединский – Ресей президентінің көмекшісі:
«Қос тараптың ұсмыныстары нақты белгіленген әрі қағазға түсірілген. Олардың біразы бойынша мәмлеге келдік деуге болады. Басты мақсат – бейбіт жандардың өміріне қауіп төндірмеу. Сондықтан, екі елдің қорғаныс министрліктері қауіпсіз дәліз құру мәселесі бойынша жұмыс атқарады. Тіпті, уақытша оқ атуды тоқтатуымыз мүмкін. Бұл жақсы прогресс деп санаймын».
Украина басшысы Владимир Зеленский болса, кезекті рет Путинге үндеу жолдап, мазақ қылды. Одан бөлек, Батыс елдеріне де айып тақты. Оның айтуынша, көмек тым баяу келіп жатыр. Одан бөлек, батыс елдерінен Украина әуе кеңістігін жабуды талап етті. Әйтпеген жағдайда Ресей әуе-ғарыш күштерінің шабуылдары арта бермек.
Владимир Зеленский – Украина президенті:
«Беларусь аумағынан ракеталар ұшып келіп жатыр. Әуе кеңістігін жабу үшін қанша адам тағы өлуі керек. Ресейге қандай қауіпсіздік кепілдігі керек. Біз оларға шабуыл жасайын деп жатқан жоқпыз. Бізде ядролық қару бар ма? Жоқ. Путинге не керек? Жерімізден кет! Кездесейік. Бірақ Макрон, Шольц секілді 30 метр қашықтыққа отырмаймын. Дәл жаныңа отрамын. Тістеп алмаймын ғой. Неден қорқасың?».
Келіссөздердің үшінші кеезеңінде бірқатар мәселе бойынша тараптар келісуі мүмкін. Алайда, Ресей мемлекеттік Думасының депутаты Леонид Слуцкийдің айтуынша, ол тек заң шығарушы органдардың ратификациялауынан кейін жүзеге асады.
