Беларусьте Украина мен Ресей ресми өкілдерінің келіссөз жүргізіліп жатыр. Соған қарамастан, Чернигов пен Сумы қалалары Ресей әскерінің қоршауында. Ал, сепаратистер Мариупольға жылжып келеді. Қазір түскен ақпарат бойынша, Харьковты жаппай бомбылау нәтижесінде, ондаған бейбіт тұрғын қаза болды. Оның ішінде балалар да бар.
Беларусьтегі келіссөздерде Ресей атынан барған делегацияны Президент көмекшісі Владимир Мединский мен мемлекеттік Думаның халықаралық комитетінің басшысы Леонид Слуцкий бастап барды. Ал, Украина атынан Қорғаныс Министрі Александр Резников, «Слуги Народа» фракциясының басшысы Давид Арахамия және Президент кеңсесінің басшысы Михаил Подоляк бастап барды. Ал, беларусь телеарналарының бірінің ютуб парақшасындағы тікелей көрсетілімді 500 мыңға жуық адам тамашалап отырған. Алайда белгісіз біреулердің талабынан кейін ол тоқтатылды. Ал Беларусь сыртқы істер министрі өз президентінің сәлемдемесін жеткізді.
Владимир Макей – Беларусь Сыртқы істер министрі:
«Сіздер ештеңеге алаңдамай өз жұмыстарыңызды атқара аласыздар. Ал, ол үшін барлық қажетті жағдайды жасау – біздің парызымыз. Президентіміз және барлық беларусь халқы бүгінгі келіссөздерде қалыптасқан дағдарыстан шығу жолдары табылатыны үшін дұғада болады».
Келіссөздерге қарамастан, Ресей шабуылы толастар емес. Черниговта Ресей әуе-ғарыш күштері мұнай базасын атқылаған. Ал, Донецк Халық Республикасының басшылығы Мариупольды басып алу үшін барын салуда. Ресей және Беларусьпен шекаралас Чернигов қаласына кірген әскери лекті жергілікті тұрғындар көсе-көлдеңең тұрып алып, кері шегінуге мәжбүрлеген.
Бұл соғысқа байланысты Еуропалық Одақ тарихи қадам жасады. Брюссельдің ресми өкілі Жозеп Боррельдің хабарлауынша, Украинаға құны 450 млн еуро көлемінде әскери көмек көрсетіледі. Оның ішінде танкке қарсы ракета кешендері мен су жаңа ұшақтар бар. Сонымен қатар, АҚШ-та «Стингер» зымыран кешендерін тасымалдауды жандандырды.
Жозеп Боррель – Еуропалық одақтың бас өкілі:
«Бүгін Еуропалық Одақ басты тыйымын аттап өтуге мәжбүр болды. Бұған дейін Одақ ешкімге қару-жарақ бермеген. Енді біз агрессорды тоқтату үшін осындай қадамға барып отырмыз. Соғыс Еуропаның ішінде жүріп жатыр. Біз кішігірім, оқ-дәрі ғана емес, ұшақтар, зымырандар жеткізіп береміз».
Еуропа Ресейдің агрессиялық қадамдарына қарсы толықтай бірікті деуге де негіз бар. Себебі, Екінші Дүниежүзілік Соғыста бейтарап болған Швецияның өзі НАТО ресми жиынына өткен аптада қатысып қана қоймай, Украинаға әскери көмек беру туралы шешім қабылдады. Ал, күні кеше Ресей әскери кемелерін Қара Теңізде өткізбейміз деген Түркия өз шешімін өзгертті. Оған сәйкес ресми Анкара халықаралық теңіз құқығын сақтауы тиіс.
