Арал қаласының маңында ұшақ құлады

Қызылорда облысында санитарлық авиация апатқа ұшырады. Ан-2 ұшағы Арал қаласынан 10 шақырым жердегі «Алтын құдық» тауық фермасы маңында құлаған. Экипаждың 2 мүшесі мен жедел жәрдем станциясының фельдшері әуе көлігінен дер кезінде шығып үлгерген. Содан кейін ұшақ отқа оранған. Санавиация ұшағы Арал қаласынан қант диабетінің ауыр түрімен ауыратын 16 жастағы жасөспірімді облыс орталығына жеткізуі керек болған. Оқиға орнына барған мамандар апатқа ауа-райының қолайсыздығы себеп болуы мүмкін деген болжам айтып отыр.