Митингке қатысты деген күдікпен Шымкент түрмесінде жатқандардың қазіргі жағдайы қалай? Қазір үшінші мегаполистегі уақытша ұстау абақтысында бұл айыппен 70-ке жуық азамат жатыр. Тілшілермен тілдескен олар темір тордағы қызметке ешқандай шағым жоқ дейді.
Шымкенттегі уақытша ұстау абақтысында жатқан бұл жігітке митинг кезінде ұрлық жасады деген айып тағылған. Алматы қаласындағы көтерілісте үш ұялы телефон ұрладым деген ол Түркістан облысындағы үйіне келе жатқан бетте ұсталыпты.
Күдікті:
«Алматыда кешке магазинге шықтық. Магазиндер сындырылып, тоналып жатты. Соның ішіне кіріп бір-екі телефон алып шықтық. Ақша керек болды. Барлығы алып жатқан екен. Соны көріп бізде алдық. Мен бұл ісіме қатты өкінемін. Енді бұл қайталанбайды. Уәде беремін. Ешқандай митингке қатыспаймын, ұрлық жасамаймын. Шынымен қатты өкініп жатырмын. Бәрі жастықпен болды».
Соттың шешімін күтіп жатқан азаматтар туысқандарымен кез-келген күні кездесуге мүмкіндігі бар. Бірақ тергеушінің рұқсатымен тек жұмыс күндері ғана. Ал сотты болғандарға арнайы шектеу бар. Сондай-ақ мекемеде сотталғандардың 40 шақтысы тұрақты жұмыспен қамтылған.
Ермек Жалғасбаев — ИЧ 167/11 тергеу изоляторының бастығы:
«Бұзақылық жасағандар бар, ұрлық жасағандар, алаяқтық жасағандар бар. Өте ауыр қылмыс, кісі өлтіру, кісі өміріне қауіп төндіргенде қамауда отыр. Қазіргі таңда тергеу изоляторында жұмыспен 40 сотталған қамтылған. Олар осы мекеменің тазалық жұмыстарын жүргізеді. Асхана, кітапхана, электрик, әртүрлі жұмыстар жүргізеді».
Айта кетейік, Ич-167/11 тергеу изоляторында митингте билік өкіліне күш қолданды, бұзақылық жасады деген айыппен 70-ке жуық азамат жатыр. Бұған дейін олардың саны 86 болатын.
