Сексуалдық құлдықта болған қыздар көмекке зәру. Қорлық пен зорлық көрген 6 әйел қазір Шымкенттегі дағдарыс орталығын паналап жүр. Соның бірі – өзбекстандық Нигора. Ата-анасы оны 10 жасында жыныстық құлдыққа сатып жіберген. 9 жыл бойы зорлыққа шыққан өзбекстандық қыз Шымкенттегі азапты жылдарын баяндады.
Нигора 9 жылы бойы тозақта болдым дейді. Оны небәрі 10 жасында ата-анасы сатып жіберген. Қожайындары қараңғы бөлмеде ұстаған, көрмеген қорлығы жоқ. Айтуынша, жалғыз өзі емес. Тағы 20 қыз жантүршігерлік жағдайларда өмір сүрген.
Нигора:
«Көп еді. Санай алмаймын. Көбісі кішкентай қыздар. Өзбекстаннан сатып алған. Әке-шешелері сатқан, ұрлап сатқан. Жобамен жиырмадай қыз еді. Аштықтан өліп қалды. Сумен нан берсе болғаны… Көп қыздар содан өліп қалды»
Құлдықтан 19 жасында қашып шыққан бойжеткенді егде жастағы әйел үйіне кіргізіп, қолдау көрсеткен. Кейін өмірлік серігімді таптым ба деп қуанған әйелдің бақыты ұзаққа созылмапты. 1 жасар баласымен жалғыз қалған ол қазір дағдарыс орталығын паналап отыр.
Малика ЖҮСІПОВА — «КӨМЕК» ДАҒДАРЫС ОРТАЛЫҒЫНЫҢ ЖЕТЕКШІСІ:
«Бірнеше психологтарды шақырып, олар бұның айтып жатқаны растығын, өтірік айтып отырмағын алға тартты. Көмек керек екен психологиялық түрде. Бір жобаға келдік. Өзіне сенеді. Жұмыс істеймін деген әңгіме айтады. Бірақ, үрейленіп, көмек орталығының сыртына шығуға қорқады»
Орталық жетекшісінің сөзінше қазір мұнда зорлыққа ұшыраған тағы 6 бойжеткен жатыр. Құлдықта болған олардың барлығы далаға шығудан қорқады.
