Келер жылдың қаңтар айында Түркістанда тұтынушылар мен тауар өндірушілерді тікелей байланыстыратын «Grand Bazar Yassy &EcoBazar» сауда орталығы ашылмақ. Сауда нысанының басты ерекшелігі – жергілікті тұрғындар мен келушілерге кез келген тауарды ешқандай делдалсыз көтерме бағада ұсынатыны. Бұл туралы бүгінгі брифингте кешеннің бас директоры Бақнұр Аюбек мәлімдеді.
«Бүгінде диқандар өз өнімін тым арзан бағада өткізуде. Арадағы алып-сатарлар өзара келіскен түрде азық-түлік бағасын екі-үш есе қымбаттатып жібереді. Бағаны тұрақтандыру үшін — өндірушінің өнімді халыққа тікелей ұсынуына қолайлы жағдайлар жасау қажет. Түркістан қаласында осындай ауқымды жобаның іске қосылуы бағаны тұрақтандыруға және азық-түлік қауіпсіздігін қамтамасыз етуге үлесін қосады» – дейді кешеннің бас директоры.
Сауда кешенінің жалпы аумағы – 14 гектар. Онда 3000-ға жуық сауда орны бар. Базар аймағында тауар сақтауға арналған 300 микроклиматтық қойма қарастырылған. Сондай-ақ қонақ үй, демалыс орындары, ойын-сауық кешендері мен фудкорттар да болмақ.
Айта кетерлігі, кешенде халыққа тиімді бағада азық-түлік ұсынуды қамтамасыз ету үшін ауыл шаруашылығы тауар өндірушілеріне облыс әкімдігі мен «Түркістан» ӘКК АҚ ұйымдастыруымен 2-3% жеңілдетілген несие берілетін болады.
Бұдан бөлек, орталық жанындағы автовокзалдан Ташкент, Самарқан, Бішкек, Хиуа және өзге де халықаралық және елішілік бағыттарға қоғамдық көліктер қатынайды.
