Жаңа жылдан бастап жасыл статусы жоқ азаматтар тырп ете алмай қалғалы тұр. Бүгінгі Үкімет отырысында денсаулық сақтау министрінің міндетін атқарушы Жандос Бүркітбаевтың мәлімдемесі осыны аңғартты. Бас дәрігердің мұндай шешіміне әлемдегі эпидахуалдың ушығуы себеп болғанға ұқсайды. Жаңа ереже төрткүл дүниені алаңдатқан «Омикрон» штамының тез таралуына тоқтам болады дейді.
Түркістан облысында жалпы 15 мыңға жуық азамат короновирус жұқтырған. Олар ашық жүйесінде қызыл статуспен белгіленеді. Ал, сары статустағы, яғни науқаспен байланысқандардың саны тіптен көп. Ауырмаған, вакцина салдырмағандарға көк статус тән. Сырқаттанғандар емделіп шыққан соң статусы өзге түске автоматты түрде өзгереді. Әйткенмен жұқпалы дертке шалдыққанын ескермей, аяғын алшаң басып жүргендер әлі де кездеседі екен.
Нұрбек Нышанов, облыстық санитариялық-эпидемиологиялық бақылау департаментінің басшысы:
«Өкінішке қарай, бізде бірнеше рет заң бұзушылыққа барған кісілер бар. Қазіргі таңда облыс көлемінде 229 адамға штраф салдық. 10 млн теңгеден астам қаржы мемлекеттік бюджетке өндірілді. Ал, сары статустағылар бас санитарлық дәрігердің қаулысымен 14 күн оқшаулануы тиіс».
Жаңа жылдан соң ереже қатаңдай түспек. Яғни енді «Ашық» жүйесінде жасыл статусы жоқтар:
сауда-ойын орталықтарына, сауда үйлеріне, сауда нүктелеріне;
— Фитнес, йога, спорттық-сауықтыру орталықтарына;
— Караоке;
— Бассейн;
— Сауна, монша;
— Банктерге;
— «Қазпошта» АҚ бөлімшелеріне;
— Халыққа қызмет көрсету орталықтарына кіруге тыйым салынады.
Жандос Бүркітбаев, ҚР денсаулық сақтау министрінің міндетін атқарушы:
«Бұл коронавирустың алдын алу бойынша қабылданған қосымша шара. Жаңа ереже 2022 жылдың 5 қаңтарынан бастап іске асыруды жоспарлап отырмыз. Сонымен қатар вакциналау мен ревакциналау жүргізу эпидахуалдың ушықпауына себеп болады деген сенімдеміз».
Айта кетейік, қазір Қазақстандағы тиісті халықтың 80 пайызы екпенің бірінші дозасын қабылдаған. Екі дозаны салдырғандардың үлесі 75 пайызға жуықтайды. Үкімет басшысы 2022 жылдың бірінші жарты жылдығында 9 млн. адамды ревакцинациялауды тапсырды.
