Бүгінгі таңда Қазақстанда жалпы 1640 ауған азаматы тұрса, соның 200-ге жуығы ЖОО-да оқиды. Соғыс болып жатқандықтан олар елден келетін қандай да бір көмектен қағылған.
Осыны ескірген біздің Үкімет ауғанстандық студенттерге виза беріп, елде болу уақытын ұзартты. Сондай-ақ, белгіленген уақытта шекарадан шыға алмай қалған 50 азаматтың елде қалу мерзімін созды. Бұл көмекті Ішкі істер министрлігінің көші-қон қызметі комитеті мен халықаралық ұйымы көрсетіп отыр.
Бекжан Нұртазин, Адам құқықтары жөніндегі ұлттық орталықтың бас сарапшысы:
«Біз ауған студенттерімен сөйлескен кезде оларға ешқандай нәсілдік және кемсітушілік болмағанын анықтадық»
Гуманитарлық акцияға Нұрсұлтан қаласында оқитын жеті ауған студенті қатысты. Одан өзге Алматы, Нұрсұлтан, Шымкент, Семей, Қарағанды қалаларында да ауған студенттері көп екен. Енді олар да осы акциядан көмек ала алады.
Мохаммад Кабир Ихсан, студент:
«Біздің елдегі жағдайды ескеріп, көмек көрсетіп отырған халықаралық ұйымдар мен Қазақстанның мемлекеттік органдарына алғысымыз шексіз. Менің отандастарым да риза. Құжат, виза жағынан көп көмек көрсетілді».
