Сарыағашта жұрт екінші Ыбырай Алтынсарин атап кеткен қария тұрады. Себебі Еламан Алтаев ауылына алғашқылардың бірі болып мектеп салған. Алғашында небары 17 үй тұрған ауыл бүгінде 500 шаңыраққа жеткен. Қарияға жетпіске толған мерейтойында жұбайы торсықтай ұл сыйлады. Бүгінде оның есімі – Жетпісбай. 8 ұл қыздан 35 немере 10 шөбере сүйіп отырған ақсақал жайында толығырақ Шынар Әділханқызы тарқатсын.
Кезінде Халық депутаттары селолық Кеңестің депутаты болған Еламан Алтаев – бүгінде Сарыағаш ауданының құрметті азаматы. Ол өңірде білім ошақтары жетіспей жатқан тұста алғашқылардың бірі болып мектеп салған. Оның ішін оқулықпен толтырып, шәкірттердің білім алуына жағдай жасады. Ол осыдан 26 жыл бұрын еді деп еске алады қария. Одан кейін тағы бірнеше соттық жер алып, оқу орнын ашыпты.
Еламан Алтаев, Сарыағаш ауданының құрметті азаматы:
«Аласапыран заманда ойыма ой түрті болып, әй неге ауылдың өзіне балдарды ары бері жүгіртпей деген ой келді да 1995 жылы 20х4 қылып, 5 бөлмелі мектеп салдым. Ал 20 жылы салынған 69 мектеп 1100 оқушымен толықтырылып отыр. Бұл деген осындай келген азаматтардың өсіп өнгенін, жағдайларының сәл болсын жақсы болғанының белгісі деп білемін».
Көпке үлгі азамат мектеп салдым деп қарап қалмады. Сол шақта мәдениет үйі мен кітапхананың құрылысын қатар жүргізді. Бүгінде сол мәдениет үйінде әжелер ансамблі жұмыс істейді. Ал ансамбль аудандық, облыстық байқауларда жүлделі орын алып жүр. Ел үшін қызмет етіп жүрген Еламан Алтаев мұндай игі істі азаматтық парыз санайды. Ал замандастары болса оны үлгі тұтады.
Ермұрат Бердімұратов, замандасы:
«Еламан Алтаев әулетіміздің үлкені. Топ басшысы. Осы еліне жасаған қызметі көп. Оны бүкіл ауыл, аудан емес облыс, республикаға да әйгілі. Осы елдің алғысын алып жүрген адам. Осынша жасқа қарамай күн демей, түнде түн демей ауылына, елімізге қызмет қылып жүрген адам. Ол Қазақстанның, Сарыағаш ауданының құрметті азаматы атағын алған».
Одан өзге мешіт құрылысын жүргізіп, пайдалануға берді. Осылайша өмір бойы ел игілігі үшін еңбек еткен Еламан Алтайұлы әлі де аттан түспеген. Қашан да, ауданда, облыста өтіп жатқан түрлі мәдени іс-шаралардың, қоғамдық жұмыстардың бел ортасында жүреді.
