Пиротехникалық заттарға тосқауыл. Жаңа жыл мерекесі қарсаңында заңсыз отшашулардың саудасы қызады. Алайда тұтынушылар да, кәсіпкерлер де қауіпсіздік ережесін сақтай бермейді. Салдарынан өткен жылы дәл осы маусымда шоқты құрылғылардың қатысуымен оннан астам оқиға тіркелген. Мамандар оқыс жағдайлардың алдын алу үшін рейд жүргізуді бастап кетті.
Төтеншеліктер сауда орындарында жаңа жылдық безендірулер мен пиротехникалардың сату ережесін түсіндіруде. Алдын алу іс шарасы республика көлемінде 15 желтоқсаннан басталды. Мерекеге әлі 10 күн қалғандықтан ба, орталық базарда қауіпті құрылғыларды таппадық. Алайда шырша, фейерверк пен жарылғыш заттардың саудасы жүріп тұр.
Мейрамхан Базарбек, Түркістан қаласы төтенше жағдайлар басқармасының аға инженері:
«Қазіргі таңда аралау барысында ешқандай пиротехникалық, фейерверк, жарылғыш заттар анықталған жоқ. Ал шырша гирлянды шамдарын сатушыларға ескерту жасалды. Және де арнайы дайындалған жадынама қағаздары таратылып, саудагерлерге өрт қауіпсіздік ережелерін сақтауға шақырдық».
Полиция қызметкерлері де оқыс оқиғалардан сақтануға шақырады. Ішкі істер министрлігінің ресми өкілі Нұрділдә Ораз қауіпсіздікті саудагерлерден бөлек, тұрғындар да білу керек дейді.
Нұрділдә Ораз, ҚР Ішкі істер министрлігінің ресми өкілі:
«Қолдану тәсілімен міндетті түрде танысып шығу керек. Сақтау мерзіміне де мән беру керек. Жарамдық мерзімі өтіп кеткен жағдайда мүлдем қолданбақ түгілі қолға ұстамау қажет. Бұл құрылғыларпдың жанында шылым шегуге болмайды. Атқыш құралдарды көлік тұрағында тұрған темір тұлпарлардың жанында ашпау керек. Қолданар болсаңыз, өртке қауіпті жерлерден 50 метр қашықтықта тұру керек».
Айта кетейік, пиротехникалық заттарды сатуға жауапты министрліктің бұйрығы бар. 7 жыл бұрын бекітілген арнайы ережеде тіпті сақтау қоймасында дейін егжей-тегжейлі айтылған. Бұл құрылғыны кәсіпке айналдырам дегендер заңды бұзса, 25 АЕК көлемінде яғни 72925 теңге айыппұл салынады.
