АҚШ-тың Кентукки штатындағы дүлей дауыл салдарынан қаза тапқандар саны 100-ден асып түсті. Барлығы фабрика жұмысшылары. Дауыл кезінде үйінді астында қалған. Президент Джо Байден төтенше жағдай жариялады. Дауыл эпицентріне айналған Мэйфилд қаласы толықтай жермен-жексен болды.
Рождество кезінде әдеттегідей тапсырыс көп болғандықтан, шырақ шам шығаратын фабрика жұмысшылары күн демей, түн демей жұмыс істеген. Сондықтан, дауыл түн кезінде болса да, фабрикада көп адам болыпты. Өкінішке орай, оның тек 40-ын ғана құтқарушылар лезде шығарып үлгерген. Алғашында қаза тапқандар саны 50-ге жуық деген мәлімет келтірілгенімен, үйінді астында одан да көп адам жатқаны белгілі болды.
Энди Бешир, Кентукки штатының губернаторы:
«Фабрика ішінде 110 адам болған. Өкінішке орай, алғашында жұмысшыларды шығаруға бағытталған құтқарушылар саны бар болғаны 40 адам болды. Дегенмен, қазір Ұлттық гвардия сарбаздары көмектесуде. Құтқарушылар әлі де қаза болғандардың денесін үйінді астынан шығаруда. Қазір бүкіл Америкадан 2,3 млн доллар қаражат жиналды. Осы ақшаның әр центі қаза болғандар мен зардап шеккендердің отбасына беріледі».
Кәсіпорын аман қалған қызметкері Отем Киркс қирағалы жатқан дәлізден қалай қашып құтылғанын өзі де түсінбей қалған. Ал, Отемнің сүйіктісі Ланнис Орд сол жерде жан тәсілім етті. Дегенмен, дәлізден қашып шықса да, үстіне қабырға құлайын деп жатқан жерден тағы бір қызметкер Отемді шығарып алған.
Отем Киркс, кәсіпорын қызметкері:
«Дабыл соғылғанда бас сауғалауға мүлдем уақытымыз болмады. Басшылық торнадо болады дегенде бізді бірден үйімізге қайтару керек еді. Кейбір жұмысшылар ескертуден кейін қайтып кетті. Бір сәт ішінде ғимарат жермен-жексен болды. Барлықтарың қашыңдар деп рациямен хабар бергенде адамдардың үстіне қабырғалар құлай бастады. Ланнистен айырылғанымды білгенімде, мен де сол жерде болуым керек деген ой жанымды жегідей жеп барады».
Мэйфилд қаласы толықтай дауыл кесірінен астан-кестен болғандықтан, тұрғындарға арнап, лагерь тұрғызылды. Қала тұрғындары бір мезетте бар мүліктерінен айырылып отыр. Жүздеген адам лагерьге де сыймай шіркеуден пана іздеуге мәжбүр болған. Олар, дауыл болған Мэйфилдтен, Уинго қаласына дейін барған. Олардың айтуынша, қала қарулы қақтығыс кезіндегіге ұқсап тұр. Себебі, барлық ғимараттың сау-тамтығы қалмаған.
Рональд Хейс, Мэйфилд тұрғыны:
«Менің пәтерім де, оның ішіндегі барлық мүліктерден айырылдым. Көлігім де үйінді астында қалды. Менің көршілерім де барынан айырылды. Қатты дауылды естіп, дәлізге шыққанымда адамдардың жерге құлап жатқанын байқадым. Адамдар жылап, дұға оқып жатты. Әрең дегенде аман қалдық. Соған да шүкір».
Барлығы штатта, 4 дүлей дауыл соққан. Оның біреуі ұзаққа созылып, жылдамдығы сағатына 322 шақырымға жеткен. Ондаған мың адам жарықсыз қалған. Дүлей дауыл Арканзас, Иллинойс, Индиана, Миссури Миссисипи, Огайо мен Тенниси штаттарында да болған. Бірақ ең қатты зардап шеккен Кентукки штаты.
