Халық қалаған вакцинасын ақылы түрде ала алады. Елге Pfizer келгелі әншейінде тегін салдырмайтын елде екпеге деген қызығушылық күрт артқан. Тіпті ақысын төлейік деушілер де бар. Әсіресе, АҚШ пен Еуропаға емін-еркін барғысы келетін азаматтар жағы… Денсаулық сақтау министрінің екпені коммерциялық нарыққа жеткізуге қолдау сұрауы осыған байланысты.
Денсаулық сақтау министрі Алексей Цой вакцинаның жеңілдігі бар категорияға жатпайтын жалпы жұртқа ақылы түрде салынатынын мәлімдеді. Дегенмен қазақстандықтар ұзақ күткен Pfizer екпесі қанша тұратыны әзірге белгісіз. Министрдің айтуынша, оның құнын бәсекелі орта анықтайтын болады. Аталған екпе бүгінде еліміздің жеті өңірінде салынып жатыр. Әзірге 379 мың дозасы әкелінген. Ал екінші партиясы 20 қарашаға дейін жеткізіледі дейді.
Алексей Цой, ҚР Денсаулық сақтау министрі:
«Осы жылдың соңына дейін вакцина айналымға түсуі керек деп жоспарлап отырмыз. Өңірлерге жеткізу, оның тетіктері, орнын әлі анықтаймыз. Вакцинаны сақтау талаптары өте маңызды. Препарат вакцинациямен айналысып жатқан, мұздатқыштары, белгілі бір талаптары бар нысандарға жеткізілетін болады».
Pfizer вакцинасын салу ерікті түрде жүріп жатыр. Балалар үшін ата-ана рұқсат берсе болғаны. Десе де дәл бүгін үкімет отырысында екпе алмаған балаларды сауда орталықтарына кіргізуге шектеу енгізілетіні айтылды. Бүгінге дейін 1313 бала, 247 жүкті және бала емізетін әйелге екпе салынып үлгерген. Ал үкімет басшысы ревакцинация жасауды жоспарлап отырғанын мәлімдеді.
Асқар Мамин – ҚР Премьер-министрі:
«Қазіргі уақытта 8,5 миллионнан астам – 18 жастан асқан азаматтың 75 пайызы екпенің бірінші компонентін және 7,8 млн адам – ел тұрғындарының 69 пайызы екінші компонентін салдырды. Халықты вакциналаумен және ревакциналаумен қамтамасыз ету қажет. Қазір біз Дүниежүзілік денсаулық сақтау ұйымының ұсынысы бойынша вакциналауға жататын санаттарды кеңейтіп жатырмыз».
Айта кетейік, бүгінде коронавирусқа қарсы вакциналау әлемнің 207 елінде жүргізілуде. Әлемдік рейтингте еліміз 104-орында тұр. Ал ТМД аумағы бойынша алғашқы орынға шықты.
