Жүйнек аулына қарасты Шыпан елді мекенінің тұрғындары сабаққа жіберген балалары үйге оралғанша имандарын үйіріп отырады. Өйткені мектеп тура үлкен жолдың бойында орналасқан, көліктер толассыз әрі ызғып өтеді. Жол апаты жиі болады. Осы жақында ғана тағы бір мектеп оқушысын көлік қағып кеткелі, жұртшылықта тіпті тағат қалмаған. Жоғарыдағыларға мектеп пен әлгі жол арасына кедергі қойып беруді айтудан шаршаған олар енді не істерін, қайда барарын білмей дал. Тақырыпты оқиға орнынан тілшіміз Жандос Тастемір тарқатады.
Бір емес, тұтас төрт адамның өмірін жалмаған апат тап осы жерде болған. Тіпті сондағы көліктердің сынығы жол жиегінде әлі күнге дейін жатыр. Бұл –Түркістан-Атайбай бағытындағы жол. Көліктер ызғып жатыр.
Дінмұхаммед Бегинов, куәгер:
«Соғысқаннан кейін барып шықтым мен. Матиз бен опельдің біреуі мына жерде, екіншісі ана жерде жатты. Жан-жағын қан жуып кеткен. Кесілген қолдар әлі күнге көз алдымда».
Бір қызығы дәл жанында мектеп тұр. Жол бойында ол туралы 7-8 белгі болғанымен, оны елеп жатқан көлік тізгіндеуші жоқ.
Жергілікті атқамінерлерден қайыр болмаған соң, тұрғындар жасанды жол белгісін өздері жасап алған. Содан бері сәл де болса жүргізушілер көлік жылдамдығын баяулататын болыпты. Алайда, ондайлар өте аз. Көліктер ызғынан қорыққан бастауыш сынып оқушыларының ата-анасы балаларын өздері әкеліп-әкетеді. Соның бірі – ауылдың байырғы тұрғыны Әбдіжаппар қарияның немересі. Бүгінде 8 сыныпта оқитын ол сабақтан қас қарайғанда бір-ақ шағады. Сондықтан жолдан өтерде қорқатынын айтады ол.
Әбдіжаппар Абдуахапов, қамқоршылық кеңесінің мүшесі:
«Көлікке отырса, есін жоғалтып алатындар көп қой. Құйындай ызғып өте шығады тура. Қала берді, жүргізуші куәлігін сатып алғандар да бар. Міне солар бұл жерден өтерде, тіпті аялдамайды да. Жалпы қандай да бір шешім қабылдау үшін міндетті түрде адам өлуі керек пе? Жоғарыдағыларға өтініш. Осы балалардың болашағы үшін, өтініш сіздерден, мәселені шешіп беріңіздерші».
Шыпан мектебінде 600-тен аса бала білім алады. Оның жартысына жуығы жолдың қарсы тарапында тұрады. Сондықтан баласы үшін алаңдамайтын ата-ана аз. Себебі кей жүргізушілер бала тұрмақ, кезекші мектеп қызметкерлерінің өзіне пысқырып та қарамайтын көрінеді.
Әнуар Жұмаділлаев, Шыпан жалпы орта мектебінің директоры:
«Жаяу өткіншілер жолақшасы да, муляж да бар. Бірақ бәрібір оқушылардың жағдайын уайымдап отырамыз. Өйткені көліктердің көбі жүйткіп өтеді. Оқушылар келе жатқанда, түсте қайтатын уақытта ерікті мұғалімдерден кезекші қоямыз жалаушалатып. Бәрібір де техниканың аты – техника. Ата-ана да, біз де уайымдап отырамыз».
Тұрғындар биліктен бір ғана нәрсе – жол кедергісі мен бейнебақылау камерасын орнатуды талап етеді. Ал, аудан басшысы Ғани Рысбек бұл мәселенің өз құзырына жатпайтынын айтып, керісінше тұрғындардың өзін кінәлай кетті.
Ғани Рысбеков, Сауран ауданының әкімі:
«Ең үлкен мәселе камера қою болып тұр. Бұл мәселе жөнінде басқармалармен жұмыс істеп жатырмыз. Мәселе – біздің назарымызда».
