«Nur Otan» партиясының «30 игі іс» акциясы мен «Халыққа көмек» партиялық жобасы аясында Сайрам аудандық мәслихатының депутаттары, «Nur Otan» фракциясының мүшелері қайырымдылық жасады. Олар өз қаражатынан әлеуметтік аз қамтылған 10 отбасына қысқы отын жағынан көмектесті.
Атап айтқанда, Мұхиддин Сыддықов Қарабұлақ ауылындағы бес отбасына, Қадырбек Қуатбеков Қарасу ауылындағы 5 отбасына көмір жеткізіп берді. Депутаттар орталық жылумен қамтамасыз етілмеген жеке үй тұрғындары, оның ішінде жалғызбасты қарттар мен әлеуметтік осал топтағы азаматтарға 30 тоннаға жуық көмір жеткізіп берді. Бұған балаша қуанған ауыл тұрғындары алғыс жаудырды.
Игі істердің бірқатары «Nur Otan» партиясының Сайрам аудандық филиалының қоғамдық қабылдау бөлмесіне түскен өтініштер негізінде жүзеге асырылды. Мұқтаж тұрғындарға көмектесуді өздеріне азаматтық борыш санайтын Сайрам аудандық мәслихат депутаттары мен партияның белсенді мүшелері қамқорлық жасауды дәстүрге айналдырған.
Облыс әкімі, партияның Түркістан облыстық филиалының төрағасы Өмірзақ Шөкеев қоғамдық қабылдауды жиілетіп, елдің өтініш-тілегін тыңдауды тапсырған болатын. Өңірде дәл қазір осы бағытта қызу жұмыс атқарылып жатыр. Соның ішінде Сайрам ауданында жыл басынан бері барлық деңгейдегі мәслихат депутаттары 182 жеке қабылдау өткізіп, тұрғындардың 961 өтінішін қараған. Қоғамдық қабылдауға келген 548 азаматтың мәселесі оңтайлы шешілсе, 415 азаматқа заң аясында кеңес берілген.
“Nur Otan” партиясы Түркістан облыстық филиалының баспасөз қызметі
