Енді кеншілер мен металлургтер зейнетке ерте шығуы мүмкін. Абай шахтасындағы апаттан кейін Мәжілісте «Ақ жол» фракциясы мамандардың зейнетке шығу жасын төмендетуді талап етті.
Бұрын аса қауіпті кәсіп иелері 1-ші және 2-ші тізім бойынша зейнетке ерте шығатын. Ал бүгінде олардың дені тіпті зейнет жасына да жетпей, апатқа ұшырап немесе еңбекке жарамсыз болып қалуда. Басын қауіпке тіккен жанкештілер 50-ге дейін өмір сүрмесе, уәде етілген «жоғары төлемдердің қажеті қанша?», – деді депутаттар. Тиімсіз жұмсалып жатқан қаншама қаржыны есепке алмаған органдар бастаманы орындауға миллиардтаған ақша қажет деп отыр.
Мақсат Раманқұлов, ҚР Парламент Мәжілісінің депутаты:
«Шенеуніктер денсаулығынан айырылып жатқан осы адамдардың еңбегіне мемлекеттің кірісі тікелей тәуелді екенін ұмытып кеткен. Еңбек министрлігі депутаттардың талаптарын жоққа шығарады және қолайлы нұсқаларды іздемейді. Мысалы, қажетті шығындарды азайтуға әкелетін осы тізімдерді қайта қарауға және қысқартуға да болады».
