2021 жылдың 9 айында басқарма тарапынан 743 азаматтың арыз-шағымдары қаралып, олардың барлығына заңмен белгіленген мерзімде жауап берілді.
Осы бойынша 158 тексеру жүргізіліп, нәтижесінде мекемелер мен кәсіпорындарда 189 заң бұзушылық анықталды. Олардың ішінде 168-сі жойылып, заңға сәйкестендірілді. Бұл туралы брифингте Түркістан облысы еңбек инспекциясы басқармасының басшысы Берік Ибадуллаев мәлімдеді.
Сондай-ақ, анықталған заң бұзушылықтардың негізінде 110 нұсқама беріліп, еңбек заңнамасының бұзылуы бойынша 3 026 387 теңге көлемінде айыппұл салынған.
Берік Ибадуллаев, облыстық Еңбек инспекциясы басқармасының басшысы:
«2021 жылдың 9 айында Түркістан облысында 9 еңбек жанжалы тіркелген. Оның 3-і – жалақыны көтеру, 3-і – еңбек ақыларын уақытында төлемеу, 3-і – техниканы жалға беру және қызмет көрсету бойынша. Жұмыс қорытындысы бойынша барлық еңбек жанжалы шешімін тапты. 2021 жылдың басынан облыс бойынша 14 мекемеде жалақы қарызының орын алғаны анықталды. Ол бойынша 1,6 млн теңгеге әкімшілік айыппұлдар салынып, орындалуы міндетті нұсқамалар берілді. Сондай-ақ, облыс кәсіпорындарында 2021 жылдың 9 айында 52 жазатайым оқиға орын алған».
Түркістан облысының Өңірлік коммуникациялар қызметі
