Себебі Беларусь елін артқа тастап, шекараны кесіп өтпек болған мыңдаған босқын тікен сымды бұзып, поляк шекарашылары және полицейлерімен қақтығысқа түскен. Елдің қорғаныс министрлігі оқиғаның видеосын жариялады. Польша үкіметі шекарадағы қауіпсіздікті күшейту үшін тағы 12 мың сарбаз әкелді.
Қазір екі мемлекет шекарасына Таяу Шығыс пен Африкадан бас сауғалаған 4 мыңға жуық мигрант жиналған. Бұдан бөлек Беларусьтің ішкі аймағында тағы 10 мыңнан аса босқын Еуропаға өтуге дайындалып жатыр екен. Шекарадағы ахуалдың шиеленісуіне байланысты Варшава Кузница мекеніндегі бақылау-тексеру бекетін жауып тастаған.
Павел Солох, Польша Ұлттық қауіпсіздік бюросының басшысы:
«Ел шекарасындағы жағдай драмалық фильмге ұқсайды. Босқындардың шекараға шабуылы үзіліссіз жалғаса бере ме деп қорқамыз. Біздегі бар ақпарат бойынша агрессивті топтар бұдан да зор күшпен шабуылдамақ. Олар: жас, күші толысқан ер адамдар, арасында бірақ балалар да бар».
Польша президенті Анджей Дуда осы мәселеге байланысты кезектен тыс шұғыл үкімет отырысын өткізді. Бастапқыда босқындар Литва шекарасын торуылдағанымен, соңғы апталарда Польшамен шекараны бұзып өтпек. Елдің қорғаныс министрі Мариуш Блащак шекараға 12 000 сарбаз жіберілгенін және бірде-бір босқынды өткізбеу үшін қажетті барлық шаралардың қолға алынатынын өзінің твиттердегі парақшасында жазған.
Петр Мюллер, Польша үкіметінің ресми өкілі:
«Польша-Беларусь шекарасында мұндай жағдай бұрын соңды болмаған. Беларусь билігі Еуроодақ санкциялары үшін босқындарды шекараға әдейі бағыттап жатыр деп санаймын. Шекарашылар, полиция мен әскерилердің арқасында күш қолдана отырып, өтпекші болған босқындардың заңсыз әрекетіне тоқтау қойылды. Ештеңеден тайынбайтын мыңдаған адам Польшаға қауіп төндіріп тұр деп айта аламын».
Тағы бір ерекше жайт, Польша осы уақытқа дейін Еуропалық Одақтың шекаралық бақылау қызметі «Фронтекстің» ұсынған көмегінен бас тартып келді. Қалыптасқан жағдайдан кейін Одақ өз көмегін қайтадан ұсынып отыр.
Петр Мюллер, Польша үкіметінің ресми өкілі:
«Қазір бірнеше мың әскери мен полицей шекараны күзетуде. Әсіресе, босқындардың шабуылына төтеп бере алмайды деген қауіп басым аймақтарға баса назар аударудамыз. Сондай-ақ, шекарада әскери қақтығыс қаупі де жоқ емес. Дегенмен, біз одан қорқамыз деу қате. Себебі, көршілес ел тарапынан арандатушылық қадамдар кез келген сәтте басталуы мүмкін».
Болжам бойынша, Беларусь президенті Александр Лукашенко былтырғы наразылық акцияларын басып-жаншыған кезде Еуропалық Одақ тарапынан санкция салынған еді. Осыған қастасқан ол Таяу Шығыстан келген босқындарды әдейі жіберіп, қаржыландырып отыр деген пікір басым. Ресми Минск бұл айыптауды жоққа шығарып, мигранттық дағдарыс үшін көрші елдерді сынға алды.
